| | Møtte enka etter krigshelt Publisert 11.06.2002 11:09 - Oppdatert 11.06.2002 13:15 Kong Harald la i føremiddag ned krans på minnebautaen over krigshelten Harald Risnes. Der møtte han og Dronninga også enka etter oberstløytnanten, Aslaug Risnes.
Aslaug Risnes deltok sjølv i kampane under andre verdskrig, og fekk i dag møte Kongen for tredje gong i sitt liv.
- Minnesmerket her er over dei siste som deltok i kamphandlingar i Noreg, og difor gler det meg veldig at han og Dronninga tok seg tid til å kome hit, seier Aslaug Risnes.
Det var ei svært høgtidleg ramme då kransen vart lagt ned av Kong Harald. Folket reiste seg, dei militære og politiet stod i givakt og nasjonalsangen vart spelt.
Harald Risnes var best kjend som sjef for heimestyrkane "Bjørn West" i Matrefjella dei siste månadene i krigen. Han var med under Måløy-raidet, og gjorde mellom anna teneste på norske torpedobåtar på oppdrag langs norskekysten. Han var sjef for HV10 til han døydde i 1967, og har fått den høgste norske utmerkinga for krigsinnsats nokon kan få i Noreg: Krigskorset med sverd.
| |
|