Ludvig Eikaas sitt portrett av avtroppande kringkastingssjef Einar Førde er eit dobbeltportrett av Førde og hin mannen. Oppdraget var å vere tru mot Førde sitt sjølvbilete; den fandenivoldske Einar Førde. Måleriet er NRK si offisielle avskjedsgåve til Førde.
- Ludvig Eikaas måla portrettet utan modellen til stades, og det er lettare sagt enn gjort å få til eit så godt portrett då, seier Magni Øvrebotten. Når eg tykte han understreka dobbeltportettet vel mykje med å måle hin mannen på skjortebrystet, kom det kjapt frå Ludvig :”Den er for østlendinger, du skjønner de ser ikke dobble botner”.
Den metallgrå fargen i måleriet spelar på at Einar Førde er frå aluminiumsbygda Høyanger. Dei som kjenner Førdes forhold til sunnfjordingar – eit folkeslag med ei blå rand etter ryggen, som han seier – vil kanskje sjå at det er to sunnfjordingar som står bak dette portrettet.
Magni Øvrebotten overrekte måleriet på NRK-styret si markering av Einar Førdes avgang.