– Dette er uverkeleg og slikt som ein berre opplever på film. Det å tenkje på at vi stod og laga frukost og at nokon samstundes blir drepen i etasjen over er surrealistisk, seier Inge Storkaas Røysland til NRK.
Han bur saman med Maren Solheim Eid i første etasje i studentblokka der ei kvinne blei funnen drepen i går føremiddag.
Mann sikta for drapet
Den 29 år gamle kvinna blei funnen drepen i leilegheita si på Kalvskinnet i Trondheim sentrum i går klokka 1300.
Politiet leitte etter ein 24 år gamal sakna mann, då dei fann kvinna i studentbustaden. 24-åringen er no sikta for forsetteleg drap på 29-åringen.
Begge er studentar i Trondheim. Den drepne kvinna er ikkje heimehøyrande i byen.
24-åringen blir avhøyrd
Den 24 år gamle mannen blir avhøyrd av politiet klokka 1400 i dag. Han er no innlagt ved St. Olavs Hospital og blir truleg framstilt for varetektsfengsel i morgon.
Politiet veit ikkje dødsårsaka eller når kvinna blei drepen. Dei har gjennomført rundspørringar i nabolaget der 29-åringen og 24-åringen budde.
– Vi har vore i politiavhøyr, men berre kort, seier Maren Solheim Eid.
Korleis er det å bu her no?
– Det blir litt rart å bu ein stad der nokon har blitt drept, men det vil vel ikkje påverke oss altfor mykje, seier Storkaas Røysland.
