– Eg har tenkt litt på det på veg oppover til Røros. Kva om eg hadde komme 30 sekund eller eitt minutt seinare. Eg bruker ikkje å kikke så mykje til venstre i rundkøyringa, seier Jan Ivar Thue i Thues transport til NRK.
- Sjå bildene:
Tog midt i vegen
Jan Ivar Thue køyrer for DHL-transport. Kvar natt går turen innom Piren i Trondheim for hente last som han fraktar til Røros.
I natt blei turen litt annleis enn han er vant til og han fekk seg ei overrasking då han kom til området.
– Eg blei litt undrande og kikka meg rundt. Toget skulle ikkje vere der. Det stod inn i lagerbygningen, seier Thue.
(Artikkelen held fram under bildet)
Braste inn i lagerbygg
Klokka 03.08 fekk politiet melding om at eit godstog hadde køyrd inn i eit lagerbygg. Toget rulla 100 meter frå der jernbanesporet slutta før det traff lageret.
Avsporinga skjedde under arbeid med kontainarar på eit godstog.
– Toget køyrde gjennom eit gjerde, over ei rundkjøring, og inn i eit lagerbygg ved innkjøringa til Pirbrua i Trondheim havn, seier operasjonsleiar Bård Jacobsen ved Sør-Trøndelag politidistrikt til NRK.
Ingen personar blei skadd i avsporinga.
Hadde englevakt
Jan Ivar Thue stoppar kvar natt for å fylle diesel før han køyrer til Piren for å hente lasta.
Denne natta tok han seg også tid til å logge ut maskina han scanner varene med mens han stod i ro på bensinstasjonen.
– Eg bruker å gjere dette på veg til Piren. Ofte i eit lyskryss mens eg venter på grønt signal. Dette tek mellom 30 og 60 sekund, men akkurat i natt gjorde eg det mens eg stod i ro og det er eg glad for no, seier Thue.