Frå og med helga er det meldt flott vårvèr i heile Trøndelag. Det kan føra til flaum.
– I fjellet i trøndelag ligg det framleis snø, og denne vil smelta med alt godveret me har i vente, seier vakthavande hydrolog i NVE, Heidi Stranden.
Shorts og gummistøvlar
På sundag er det meldt mellom 18° C og 20° i begge fylka. Desse gode temperaturane ser ut til å halda seg i byrjinga av neste veke.
Mykje vatn og sumarstemning i lufta, kan føra til nokre uvante klessituasjonar.
- Det kan rett og slett bli ei gummistøvlar- og shortsveke, seier hydrologen.
- Sjå vèrvarselet for Sør-Trøndelag på yr.no
- Sjå vèrvarselet for Nord-Trøndelag på yr.no
Snø i høgda
I enkelte høgareliggjande område ligg det meir snø enn normalt, og mykje av denne kjem til å smelta frå sundag av. Mengda med vatn kjem an på kor høge temperaturane faktisk blir, og kor mykje snø som smelter.
- Sjå heile flaumvarselet på NVE sine nettsider
Ikkje stormflaum
Det vil ikkje gå frå svært låg til svært høg vassføring på kort tid.
I låglandet ligg det ikkje særleg mykje snø, men vassdraga i begge fylka kan fyllast ganske godt opp nedover.
Dei vassdraga som er regulerte vil ikkje nødvendigvis bli råka, ettersom reguleringa kan ha dempande effekt.