Utrygt vêr for Sesilåmi

På laurdag er det duka for ein av dei store styrkeprøvane for skientusiastar i landet, nemleg det 52 kilometer lange skirennet Sesilåmi frå Setesdal til Sirdal.

Over 2.500 personar skal gå løpet, og dei følgjer nøye med på vêrmeldingane, som ikkje ser svært lovande ut. Det er meldt opp til sterk kuling frå vest.

• Les òg: – Jeg har for lenge siden gitt opp å følge henne i Sesilåmi
• Les òg: Enorm interesse for Sesilåmi

Vind og snø

– Det er ein del vind på veg, så skiløparane må nok førebu seg på både vind og snø, fortel statsmeteorolog Martin Granerød.

Han seier at prognosane dei har fram til sundag ser svært sikre ut.

– Frå laurdag ettermiddag blir det nordvest stiv og til dels sterk kuling. I høgda over 300–500 meter er det varsla snø, presiserer Granerød.

• Sjekk vêrvarslinga på Yr.no
• Les òg: – Denne helgen bør man ikke dra til fjells

– Det har sett verre ut før

Ei som følgjer ekstra godt med på vêrvarslingane er leiar for hovudkomiteen i Sesilåmi, Gro Tove Frafjord. Kvar time er ho inne og oppdaterer seg.

I 2010 måtte rennet avlysast på grunn av sterk vind, men Frafjord fryktar ikkje vêrmeldingane så langt.

– Slik det ser ut nå blir det renn. Dessutan har dei det med å overdrive i vêrmeldingane, seier ho.

Siste frist for leiinga å varsla om rennet blir avlyst er måndag morgon. Men for utøvarane er det best om avgjersla kjem allereie fredag, før dei eventuelt reiser opp til Setesdalen.

Frafjord har vore i kontakt med folk som har lang fartstid i rennet, som har eksistert sidan 1975.

– Dei seier at prognosane har sett mykje verre ut enn dette, og det har likevel blitt renn. Det handlar om å ha litt is i magen.