Vurderer totalforbod mot fyrverkeri

Bakgrunnen er at meteorologane varslar sterk vind på kysten av Rogaland den siste dagen i 2010.

– Det blir liten til stiv kuling frå nordvest rundt midnatt nyttårsaftan. Dette gjer det problematisk å senda opp rakettar, seier statsmeteorolog Geir Ottar Fagerli.

Sjekk korleis vêret blir på nyttårsaftan på yr.no.

Kan bli totalforbod

Den sterke vinden gjer at det er usikkert om ein kjem til å sjå fargesprakande rakettar på himmelen i kommunane Gjesdal, Klepp, Kvitsøy, Sola, Randaberg, Rennesøy, Sandnes, Stavanger og Time i morgon. Kommunar som alle er i ansvarsområdet til Brannvesenet i Sør-Rogaland.

– Me vurderer å innføra totalforbod mot fyrverkeri på grunn av den sterke vinden. Dersom det skjer er det første gongen på dei 36 åra eg har vore tilsett i brannvesenet, seier Arild Olsen, fyrverkeriansvarleg ved Brannvesenet i Sør-Rogaland.

Les også: Å fjerna styrepinnen har ført til langt færre personskadar

Avgjersel i dag eller i morgon

Klokka 9 i dag samla brannvesenet seg i Stavanger og Sandnes for å diskutera situasjonen. Avgjersla på om det blir fyrverkeriforbod blir tatt seinare i dag eller i morgon. Eit eventutelt forbod kjem til å gjelda både privat- og fellesfyrverkeri.

– Uansett kva me kjem fram til ber me folk ta vêret på alvor og vera forsiktige med fyrverkeriet, seier Olsen.

Les også: Stjerneskudd farligere enn du tror

– Høg terskel for totalforbod

I Haugesund har brannvesenet til nå ikkje vore inne på tanken å toltalforby fyrverkeri.

– Me har ein høg terskel for å innføra eit forbod. Dersom det hadde vore lite nedbør og tørt, hadde situasjonen vore annleis. Nå er det varsla nedbør. Då meiner me det ikkje er nødvendig å innføra ekstraordninære tiltak, seier Øystein Fonnes i førebyggande avdeling hos brannvesenet i Haugesund.