– Raset er no ferdig gjennomsøkt av leitemannskap og lavinehundar. Det er ingenting som tyder på at nokon har blitt tekne av raset, seier operasjonsleiar ved Agder politidistrikt, Vidar Neset til NRK.no.
Meldinga om snøraset kom ved 12-tida laurdag. Ved 13.20-tida kom det også to helikopter til staden.
Rundt 30 personar var med i søket.
Utanfor løypa
Raset gjekk utanfor preparerte løyper like ved Hovden skisenter. Det var mellom 60 og 70 meter breitt og hadde ei høgde på opp mot 150 meter.
Dei første meldingane gjekk ut på at det kunne vere folk i raset. Difor vart det sett i gang omfattande søk.
– Vi må vere hundre prosent sikre på at det ikkje er folk inne i raset. Difor har vi sett i gang søk i raset. Sidan det er utanfor preparerte løyper er det litt krunglete å ta seg fram, sa dagleg leiar ved skisenteret Sture Christian Pilegård til NRK.no kort tid etter at raset var varsla.
– Vi overvakar situasjonen og har folk borte ved raset, sa han.
– Så langt er ingen meldt sakna, men vi har sett i gang søk i rasområdet, opplyste brannvesenet til NRK.no.
Omfattande søk
Både politi, brannvesen, fjellredningsgruppe og tre lavinehundar deltok i søket.
Dei første meldingane gjekk ut på at raset hadde gått ved eit skisenter i Valle. Dette vart kort tid seinare trukke tilbake av brannvesenet.
Tilfeldigheitene gjorde at Røde Kors var raskt på plass på staden. Dei har kurs på Hovden denne helga og gjekk inn i rasområdet på kort varsel.
