– Sylvartun er viktig fordi det er ein arena, som ivaretek det ynskjet vi har her i Setesdal om å vise kulturen, som vi er stolte av. Det er og ein eigna stad for å få dette fram, seier ordførar i Valle, Bjørgulv Lund til NRK.
Kun sommarope
Sylvartun var i fleire år ein samlingsstad for folkekunst i Setesdal. For fem-ti år sidan var her stor aktivitet, med café, kulturarrangement, sang og musikk, og sølvsmedar, som sat og laga tradisjonssølv.
I dag er Sylvartun berre ope om sommaren, i tillegg til enkelte arrangement, og eigaren av bygget har signalisert at han ynskjer å selje bygget.
No jobbar Valle kommune med å finne samarbeidspartnarar, som kan fylle bygget og gjere det til eit kraftsenter for både turistar og innbyggjarar.
Treng hjelp
Kommunen, Innovasjon Norge, Aust-Agder næringsselskap og fylkeskommunen vil vere med på eit spleiselag - i tillegg vert private aktørar invitert. Håpet er at bygget igjen skal fyllast, til dømes med café-drift, kulturskule, leikarring, folkemusikkarkiv, museum og sølvarbeid.
– Vi håpar og trur at sylvartun har ein kulturell klang vi håpar å kunne vidareføre framover, men vi ser og at det må inn fleire bein for å kunne stå støtt framover, seier ordføraren.
