SKUFFA: Trenar Leif Gautestad lovar at klubben skal slå tilbake i serie og europacup.
Foto: Øivind Eskedal/NRK– Litt språkproblem er nok årsaka til dette. Det er vel ingen av oss som trur at Anders ville ha vore i stand til å ta sjansen det ville vere for klubben å spele ein slik kamp. Dette er veldig beklageleg, seier trenar Leif Gautestad til NRK.no.
Christensen: – Trudde alt var i orden
Dansken fekk debuten sin då ØIF Arendal slo 1. divisjonsklubben Fram 36-19 i cupens første runde tysdag. Tidlegare fekk den tidlegare KIF-spelaren beskjed om at han ikkje hadde lov til å spele.
– Eg fekk beskjed om at overgangen ikkje var i orden, men at det skulle løyse seg, seier Anders Neuhaus Christensen.
– Eg tenkte ikkje meir over det. Dagen etter vart eg teken ut i troppen til cupkampen. Det første eg tenkte då var, yes no er alt i orden, men det var det ikkje, seier han.
I dag avgjorde Handballforbundet at flausa er nok til å diske arendalsklubben. Det betyr at Fram avanserer til 2. runde i NM.
– Det har vore ein kommunikasjonssvikt, som har gjort at vi har brukt Anders. Vi er ikkje ute etter å ta nokon syndebukk. Vi er ute etter å komme oss vidare, seier Leif Gautestad.
Ser at vi har gjort feil
Trenaren fortel at Fram ba forbundet om å sjå mellom fingrane på saka, då Anders Neuhaus Christensen spelte så lite at det ikkje kunne påverke resultatet. Det valde forbundet å sjå vekk ifrå.
– Vi kan appelere for å få gjort dommen om, men vi ser at vi har gjort ein feil, erkjenner det og held oss til reglementet, seier Gautestad.
Eliteserieklubben vart nummer fire både i serie og sluttspel i fjor. I cupen vart det kvartfinale. I år hadde klubben ambisjonar om cupfinale. Det kan klubben sjå langt etter på grunn av overgangstabben.
– Vi skal slå hardt tilbake i serien, og vi skal slå hardt tilbake i europacupen, seier ØIF-trenaren.
