– Eg har kun tre balltre att og dei har eg fått bestilling på. Det er heilt normale menneske som kjøper dei. Det er ikkje kriminelle. Det må vere for å forsvare seg sjølve. Eg kan ikkje forstå anna, seier Rune Dyvig ved Intersport i Arendal til NRK.no.
Politiet forstår frykta
Jan Sverre Krogstad.
Foto: Svein Sundsdal / NRKTorsdag kveld jakta politiet på mistenkte innbrotstjuvar og bilar i arendalsområdet. Politiet har fått melding om over 60 innbrot på Sørlandet den siste veka. Politiet meiner ein bande frå Aust-Europa står bak innbrota.
– Folk kjøper balltrea for å ha dei under senga dersom det dukkar opp innbrotstjuvar. Eg har selt meir enn eg gjer til vanleg, seier han.
- LES OGSÅ: Tyvjakt i Arendal
- LES OGSÅ: Politiet på bandejakt
Frykta for innbrotsbanden som herjar på Sørlandet fører til at folk gjer det dei kan for å forsvare seg. NRK kjenner også til at fleire nabolag organiserer vaktlag for å unngå innbrot. Politiet likar dårleg at folk skaffar seg våpen for å forsvare seg.
– Eg forstår at folk er engstelege og skremde over tjuveribølgja som rullar over Sørlandet. Men det er ingen grunn til å seie at det er farlege personar på ferde. Vi har ingen døme på at nokon har vore valdelege på nokon måte, seier politistasjonssjef i Arendal, Jan Sverre Krogstad til NRK.no.
– Ring politiet
Men på søndag slåst ein av tjuvane med politiet før han vart arrestert og mistenkt for fleire innbrot i Arendal natt til søndag.
– Ja vi har eitt tilfelle av det. Det var rett og slett for å komme seg unna. Så fort dei ser at folk er heime eller vert overraska, så stikke dei så fort dei kan. Det er ingen grunn til å seie at dette er farlege innbrotstjuvar. Det er ingen grunn til å vere redd for å bli overfalt, seier Krogstad.
- LES OGSÅ: – Send tyvene ut av landet
– Eg tykkjer ikkje det er grunn til at folk skal væpne seg på denne måten. Det beste er å ringje politiet, seier stasjonssjefen.
Krogstad skryt over befolkninga som tek kontakt med politiet. Han fortel at politiet vert nedringt av folk som har tips, og som er uroa etter besøk av mistenkelege dørseljarar
– Vi får inn veldig mange tips og dei vert sjekka ut. I går var det tre forsøk på innbrot. Det enda med forsøk, for dei vart overraska då vi var like i nærleiken, men vi fekk dessverre ikkje tak i dei, men vi er veldig nær, seier Krogstad.
Held vakt i nabolaga
Han er glad for at folk hjelper kvarandre med å halde vakt i nabolaga. Men påpeikar igjen at han tykkjer lite om at folk skaffar seg våpen for å forsvare seg mot innbrotstjuvane.
– Det skal vi halde oss ifrå. Det er ikkje snakk om farlege personar og det er politiet si oppgåve å gripe inn dersom det er snakk om våpen og slike ting. Eg vil ikkje rå folk til å nytte seg av det i det heile. Då kan det bli veldig ille, seier Krogstad.
Han har følgjande tips til folk som er engstelege for innbrotstjuvane.
– Ring inn tips til politiet. Få naboen til å passe på dersom ein er bortreist. Avbestill posten og ha gjerne litt lys på. Så skal vi nok få teke dei til slutt, seier han.
– Rett i hælane på dei
Ein mann er allereie arrestert.
– Vi er rett i hælane på dei. Hadde vi hatt litt flaks hadde vi kanskje arrestert fleire. Vi kan ikkje vere på ein kvar stad til ei kvar tid. Men før eller seinare har vi nok flaksen på vår side, seier Krogstad.
