I Kristiansand tingrett sa dei to seg skuldig eller delvis skuldig på dei alvorlegaste tiltalepunkta. Dei er tiltalt for både ran, vald, kidnapping og for å ha mishandla ei kvinne seksuelt.
- LES OGSÅ: Ranet kvinne under biljakten
Den 39 år gamle kvinna vart grovt mishandla i Grimstad i fjor. Ifølgje tiltalen vart ein pistol stukke i munnen hennar og trukke av gjentekne gonger. I tillegg vart ho misbrukt seksuelt.
Vill biljakt
– Eg trudde eg skulle døy. Eg ba til Gud for å få hjelp, sa kvinna frå sjukesenga til TV2.
Kvinna hadde akkurat komme heim frå kyrkja då to personar tok seg inn i leilegheita hennar i Grimstad. Dei to var på flukt frå politiet etter ei vill biljakt og ei rekkje andre alvorlege lovbrot tidlegare på dagen.
Den 35 år gamle kvinna ba om å få låne toalettet før den maskerte 34-åringen kom inn i leilegheita.
Kvinna vart slått, sparka og krevd for pengar. Valden vart grovare og grovare og det vart avfyrt to skot mot kvinna. Den andre kula streifa handa til kvinna. I tilsaman fire timar var dei to heime hos kvinna.
Nekta for valdtekt
Dei to tiltalte sa seg berre delvis skuldig på fleire av tiltaltepunkta fordi dei ikkje kjende seg att i detaljane rundt valdshandlingane. 34-åringen nekta blant anna for valdtekta.
Den 34 år gamle mannen vart arrestert kort tid etter då bilen dei to køyrde krasja i Grimstad sentrum. Kvinna rømte frå staden, men vart arrestert seinare på kvelden.
I tillegg til vald mot den eritreiske kvinna er dei to tiltalt for å ha truga med å skyte to menn i Sørlandsparken. Mannen heldt pistolen mot bakhovudet til ein av dei med fingeren på avtrekkjaren.
Det er sett av fire dagar til saka i Kristiansand tingrett.