BRANN: Det brann godt i Kvinesdal i natt.
Foto: Geir Egeland/NRK
FRUSTRERT: Tor Oddvar Torkildsen i Brannvesenet Sør er frustrert over at folk fyrer opp trass i at det er knusk tørt.
Foto: Mari Ann Albrektsen/NRK– Det er såpass opplyst og informert om at det er tørt, og når folk likevel fyrer opp er det frykteleg uansvarleg, seier Tor Oddvar Thorkildsen i Brannvesenet Sør til NRK.no.
Roa seg i natt
Det var ved 19-tida fredag at brannvesenet vart varsla om skogbrannen på Kvinesheia i Kvinesdal. Brannvesenet hadde problem med å få kontroll over brannen på grunn av vanskeleg terreng og forlot området i natt.
– Det vart kaldare og det vart rim på bakken, så brannen roa seg i løpet av natta. I løpet av laurdag føremiddag fekk vi sløkt brannen. No held to personar på med ettersløkkjing, seier han.
Ifølgje Yr.no si oversikt over skogbrannfare er det særs tørt fleire stader i landet. Både i Østfold, Akershus, Oslo, Hedmark, Oppland, Vestfold, Telemark, Aust-Agder, Vest-Agder, Rogaland og Hordaland vert det rapportert om meget stor skogbrannfare.
– Ekstremt tørt
– Det er heilt ekstremt tørt. Det er omtrent like tørt som då Frolandsbrannen starta for nokre år sidan, seier Thorkildsen.
Totalt 27 000 mål skog vart øydelagd i det som var tidenes største skogbrann i Norge.
Thorkildsen seier at mellom 150 og 200 mål skog og kratt brann opp i Kvinesdal.
– Når dei veit at det er så tørt er det utruleg at det går an å setje i gang med slikt arbeid. Difor vurderer vi å melde saka til politiet, seier han.
TØRT: Yr.no si oversikt over skogbrannfaren viser at det er særs tørt fleire stader i landet.
Foto: Skjermdump: yr.no
