Av
Bent J. Tandstad og
Wilhelm Andreas Eilertsen (Roma)
Den vesle jenta har fått namnet Leah Isadora Behn. Dette har kronprinsregent Haakon meldt frå til Stortingspresidenten i dag.
Den nyfødde veg 3760 gram, og ho er 52 centimeter lang.
Maud Angelica
Fødselen til storesyster Maud Angelica skjedde på Rikshospitalet. Ho vart fødd 29. april 2003, og vog 3516 gram ved fødselen. Faren sa etter fødselen at ho var ein gyllen halvmeter lang.
Kongeparet uttrykkjer glede over ha fått sitt tredje barnebarn.
Dronning Sonja fekk melding om fødselen i Roma, der ho har vore til stades på pave Johannes Paul II si gravferd.
Statsminister Kjell Magne Bondevik, som også er i Roma, gratulerer prinsesse Märtha Louise og Ari Behn med ei ny dotter.
Like etter gravferda i Roma gratulerte han dronning Sonja direkte med eit nytt barnebarn, og bad henne overbringe gratulasjonen også til kong Harald.
Bondevik
- Eg hadde den spesielle opplevinga at eg gjekk saman med dronninga då ho fekk beskjed på mobiltelefon. Prinsesse Märtha hadde lese inn ei melding på telefonsvararen. Dronninga var overlukkeleg, og vi snakka om at det er tankevekkjande at vi får ei melding om at eit nytt barn er fødd når vi går ut frå ei gravferd. Det er livet sin gang, seier statsminister Kjell Magne Bondevik til NRK.no/nyheter sin reporter i Roma.
Nummer fem
Den vesle jenta er nummer fem i arverekkja til den norske trona. Ho vil likevel ikkje få nokon kongeleg tittel.
Det er ikkje venta at nokon kjem på besøk til Hankø i dag. Kong Harald ligg framleis på Rikshospitalet etter operasjonen sist fredag, og dronning Sonja kjem ikkje tilbake frå Roma før i kveld.
Kronprins Haakon og kronprinsesse Mette-Marit er i London for å delta i brullaupet til prins Charles og Camilla Parker Bowles.
 |
| Leah Isadora Behn vart fødd ved heimefødsel på Bloksberg på Hankø i dag tidleg. (Scanpix-foto) |
Tips andre om denne saken
Utskriftsvennlig versjon