- Det er heilt fantastisk! Eg hadde aldri trudd eg ville bli vurdert i eit sånt selskap, så eg er litt forundra, seier ein glad Arve Henriksen.
Saman med trommeslagar Paal Nilssen-Love, har han blitt nominert til den prestisjetunge Nordisk Råds Musikkpris for 2009.
Tidlegare har mellom anna Mari Boine og komponist Natasha Barrett vunne den prestisjetunge prisen på 350 000 danske kroner.
Viktig motivasjon
Henriksen seier at denne anerkjenninga motiverer han til å halde fram å eksperimentere vidare.
- Eg held på med musikken heile tida, og det er mykje både medvind og motvind. Så når nokon synest ein er verdt ein slik nominasjon, er det noko å ta med seg vidare.
Jazzmedarbeidar i NRK, Erling Wicklund, trur nominasjonane vil stimulere norsk jazz positivt.
- Henriksen og Nilssen-Love er to heilt sentrale musikarar i den unge mellomgenerasjonen av søkjande improvisatørar. Dei to kandidatane kunne ikkje vore betre valde, dette er velfortent!
Særeigne musikarar
Slik beskriv Wicklund Norges to priskandidatar:
- Henriksen er ein original som har vekt oppsikt internasjonalt heilt sidan trioen Veslefrekk for mange år sidan. No har han utvikla sitt heilt eige, unike uttrykk. Han er ein ettertrakta trompetist over heile Europa, og er ein av våre merkelegaste og mest særprega musikarar.
- Paal Nilssen-Love har spelt sidan han var fem år gamal og sat på fanget til Art Blakey. Han er ein evig søkjande musikar som har skapt interessante alliansar internasjonalt, og som trommeslagar er han er alltid på jakt etter det som ingen har høyrd før.
Større i utlandet
Norsk jazz er anerkjent internasjonalt, men får minder merksemd her heime. Wicklund meiner nivået på improvisasjonsmusikarane i Norge i dag burde tilseie noko anna.
- Det er merkeleg, men det verkar som om våre naboland er mykje meir merksame desse musikarane enn nordmenn er. Kanskje kan desse nominasjonane hjelpe på det?
Arve Henriksen trur dei to nominasjonane er eit godt bilete på norsk jazz i augneblinken.
- Det har kome ei heil røys av jazzmusikarar som held eit høgt internasjonalt nivå i Norge, og samtidig er breidda veldig stor.
Vinnaren blir offentleggjord 2. juni.