Justisministeren og Forsvarsministeren orienterte den 10.november i fjor Stortinget om detaljane kring det som skjedde terrordagen 22.juli, og korleis norske styresmakter responderte på åtaka.
22.juli-komiteen på Stortinget skal no sjå nærmare på informasjonen og forslaga som statsrådane kom med.
Komitè-leiar Knut Arild Hareide (Krf) inviterer i dag sentrale personar til open høyring på tinget for å kasta meir lys over beredskapen 22.juli.
- LES OGSÅ: Faremo vurderer å endre forsvarsinstruks etter 22.juli
- LES OGSÅ: Justisministeren vil ha beredskapssenter for terror i Oslo
Vil ha betring på kort sikt
Dei som skal opp på talarstolen er forsvarsminister Espen Barth Eide (Ap), forsvarssjef Harald Sunde, Justisminister Grete Faremo, PST-sjef Janne Kristiansen og fungerande politidirektør Vidar Refvik.
– Me har fokus på kva norske styresmakter kan gjera for å betra beredskapen og tryggleiken i landet. Justissektoren, forsvaret og PST har sentrale roller i det spørsmålet, seier komitè-leiar Hareide til NRK.
- LES OGSÅ: 22.juli-komiteen vil ha PST på høring
Onsdag vil Hareide ha fokus på kritikkverdige punkt som det er mogleg å gjera noko med på kort sikt:
- Signal om ein ukultur internt i politiet med trugsmål mot tilsette som har uttala seg kritisk om innsatsen til politiet 22.juli
- Betre oversikt over bemanningsressursane som trengst til å sikra aktuelle terrormål i Oslo, som til dømes Stortinget, som stod éin time utan sikring etter bomba
- Behovet for ein betre helikopterberedskap i heile landet
- Tiltak som kan styrkja samarbeidet mellom forsvaret og politiet for å unngå lang responstid og uklare ansvarsområde
- Situasjonen rundt riksalarmen. Då politiet omsider slo riksalarm, 77 minutt etter at bomba gjekk av i Regjeringskvartalet, fungerte ikkje alarmen
For dårleg responstid
Under utgreiinga i november i fjor, la justisministeren og forsvarsministeren fram sju hovudpunkt som dei meiner bør bli gjenstand for politisk diskusjon framover:
- Førebygging av radikalisering og valdeleg ekstremisme
- Metodebruken til Politiet si tryggingsteneste (PST)
- Responstida til politiet
- Kommunikasjon i naudetatane
- Vern av utsette objekt
- Samhandlinga mellom politiet og Forsvaret
- Omsorg for og oppfølging av offer og pårørande
Dåverande justisminister, Knut Storberget (Ap), sa blant anna at naudnettet ikkje fungerte som det skulle 22.juli.
Han etterlyste også ein debatt rundt responstid i beredskapsetatane, og tok til orde for eit nytt beredskapssenter i Oslo for å betre kunne samkøyra fleire etatar i kampen mot terror.
Forsvarsministeren problematiserte at Heimevernet treng grønt lys frå politisk hald før dei kan bistå politiet. Ho varsla ei mogleg endring av forsvarsinstruksen, for å unngå at HV-utrykningar blir ståande på vent når alvoret rammar i framtida.
– Stort og viktig arbeid
22.juli-komiteen har 17 medlemmer frå alle stortingspartia.
Hareide seier det neppe blir tid til ein grundig gjennomgang av alle sju punkta under høyringa onsdag, men lovar at dette vil bli gjort i den endelege innstillinga, som dei skal levera i månadskiftet februar/mars.
– Dette er eit stort og viktig arbeid som me kjem til å bruka mykje tid på i løpet av heile februar, seier komitè-leiar Hareide.
Komiteen inviterer til debatt i Stortinget den 8.mars, etter at komiteen er ferdig med sitt arbeid.
- LES OGSÅ: Dette krever opposisjonen svar på etter 22.juli
- LES OGSÅ: 22.juli-beredskapen under lupa