Etterlyser Grefsen-meteoritten

Den 30.april i år fann ein anonym person ein meteoritt på 4,65 kilo på Grefsen i Oslo.

Astronomen Knut Jørgen Røed Ødegaard og kona hans, meteoritt-leitaren Anne Mette Sannes blei kontakta av den anonyme finnaren, og tok med seg spesialustyr for å samla saman alle bitane av meteoritten.

30.april viste Ødegaard og kona hans stolt fram Grefsen-meteoritten på Dagsrevyen.

Meteoritten er den største som er funnen i Noreg på hundre år, og den tredje største som er funnen på norsk grunn nokosinne.

No går Naturhistorisk museum i Oslo ut og etterlyser meteoritten. Ifølge førsteamanuensis og forskar ved Naturhistorisk museum, Rune Selbekk, har ingen ved museet sett meteoritten siden den blei vist fram på Dagsrevyen.

Verd fleire titals tusen

No lovar forskarane finnarløn til den som sørgjer for at steinen frå verdsrommet hamnar i museet si samling.

– Me håpar jo at me blir kontakta av finnaren, og at me kan få sjå litt på steinen. Aller helst håpar me å få lov til å overta den på ein eller annan måte, seier Selbekk.

Museet husar allereie den nasjonale meteorittsamlinga, som inneheld 14 av 15 meteorittar funne i Noreg før det siste nedfallet i 2012, då det på kort tid blei oppdaga meteorittar på både Rodeløkka, Ekeberg og Grefsen i Oslo.

Ifølgje Selbekk kan slike steinar vera verd titusenvis av kroner. Men for forskinga er den verd enda meir.

– Meteorittar fortel veldig mykje om korleis planetar er danna, og kan gje oss veldig mykje viktig informasjon om korleis vår eigen klode blei til og eventuelt korleis den har utvikla seg, seier forskaren.

Ikkje lovverk som hindrar sal til utlandet

Men etter at den blei presentert på fjernsynet i vår har ikkje forskarar fått høve til å undersøkja meteoritten på nært hald. Identiteten til finnaren er framleis ukjend, og det er uvisst om meteoritten framleis er i Noreg.

Ifølgje Selbekk er det nemleg ein stor marknad for kjøp og sal av meteorittar. Noreg har i dag ikkje eit eige lovverk som sikrar at naturvitskapelege objekt, som til dømes meteorittar, ikkje forsvinn ut av landet.

Eit slikt lovverk finst i land som Danmark, Australia, England og Tyskland, ifølgje museet.

Museet kan dermed ikkje fremja krav om å få utlevert meteoritten til samlinga si.

– Det verste som kan skje er at den blir seld ut av landet, eller eventuelt splitta opp i småbitar. Det er eit objekt som me først bør forska på, deretter stilla ut på Naturhistorisk museum til glede for publikum, meiner forskaren.