– Golvet byrja å gynge, så vi sprang ut på gata

– Vi arrangerte ein fest heime med meg, så vi var mange vener som var samla. Plutseleg byrja golvet å skjelve, og bygget starta å gynge, fortel Linn Støme som studerer samfunnsøkonomi i den italienske byen.

LES: Kraftig jordskjelv i Nord-Italia

– Så byrja bilete og pynt å falle ned frå hyller og veggar, så vi sprang ned trappa frå sjette etasje og ut på vegen, held ho fram.

– Folk gret og var veldig stressa

Gatene fylte seg opp gråtande folk som var veldig redde.

– Eg blei litt perpleks, som nordmann er vi ikkje vande med jordskjelv og tenker gjerne at det ordnar seg, men italienarane som stod ute på gata var veldig stressa, seier den norske studenten.

I Modena var det ein spesiell kveld fordi alle butikkane var nattopne, så det var mykje folk ute allereie før jordskjelvet tok til.

– Etter jordskjelvet hadde gått byrja gatene å fylle seg opp endå meir med folk som ikkje følte dei kunne vere heime, folk gret og var veldig stressa, seier Linn.

Mange gamle bygningar er øydelagde

Minst fem personar er til no funne døde i jordskjelvet som skjedde klokka fire i natt i Nord-Italia.

Mellom anna døydde ei 37 år gamal tysk kvinne fordi ho ikkje fekk puste – truleg var dette eit angstanfall utløyst av jordskjelvet.

Det har så langt ikkje kome inn meldingar om skadde eller sakna nordmenn.

Redningsmannskap jobbar på spreng for å redde ut menneske som er fanga inne i samanraste bygningar.

– Det er mange gamle bygningar og hus som er øydelagde her i byen, fortel studenten.

Får beskjed om å halde seg lågt nede

Ei rekkje etterskjelv ramma området, og myndigheitene måtte be innbyggjarane om å halde seg heime. Ifølgje italienske medium er det venta eit nytt jordskjelv før klokka seks i ettermiddag.

– Vi har fått beskjed om å halde oss unna høge etasjar dersom det blir eit nytt skjelv seinare i dag, fortel Linn.

– Dersom det kjem eit nytt skjelv slik dei fryktar skal vi halde oss utandørs, og i alle fall langt unna gamle bygningar, legg ho til.

Kart