Skien sine største møter

Denne fredagen er Rogaland retro dedikert John Skien, som etter 40 år i NRK nå går av som pensjonist. Me spør TV-legenda; kven er dei største personane du har møtt i karrieren di? Han tar ikkje lang tenketid.

– John Cleese og Thor Heyerdahl, seier han.

• Les og sjå bilete: En æra er over!

Thor Heyerdahl fekk han møta i 1993 i samanheng med ei valsending i TV-Rogaland. På Solastranda snakka Heyerdahl om kor viktig miljøspørsmålet bør vera i ein valkamp.

– Det var fantastisk. Eg hugsar han berre hadde ein dress på seg, og eg spurte om han fraus, men det var ikkje tale om. Han hadde ingen primadonnanykker, fortel Skien.

• Sjå klippet med Heyerdahl nedst i artikkelen.

Avbraut ferien

Det var i seinare tider han fekk møta komikaren, som han er ein svært stor tilhengar av. Sjølvaste John Marwood Cleese frå Monty Python og Fawlty Towers.

Cleese var i Stavanger i 2005 for å spela inn ein tryggingsvideo for oljeselskapet Statoil, der Pål Mangor Kvammen var regissør. NRK fekk tilbod om eksklusivt intervju, og John Skien var den naturlege mannen å ringa. Det einaste problemet var at Skien var på båtferie i Sunnhordland saman med Dag Indrebø.

Han var likevel ikkje i tvil.

– Dei sa at eg kunne intervjua han om eg ville. Å helledussen! Det er klart ein vil noko slik, så eg avbraut ferien og reiste ned til Stavanger. Etter litt førebuing møtte eg han på Hotel Clarion, fortel Skien.

Han seier at dette var eit møte, som for han er like stort, som eit møte med Paul McCartney vil vera for mange andre. Men sjølv om det var ei verdsstjerne han møtte, var heller ikkje Cleese ein mann med primadonnanykker ifølgje Skien.

– Han var ein kjempekjekk kar, og me spøkte mykje før me sette i gang intervjuet.

Skien sjølv ville vera sikker på at han fekk eit minne frå stunda si saman med Cleese. Han skal derfor ha sagt til fotograf Erik Waage at han fekk juling om han ikkje tok eit bilete av dei to saman. Og bilete fekk han.