PÅ NORSK:
(Muitaleaddji: Kristina Utsi)
Dákko buohta, nuppe bealde vuona, lea báiki man namma lea Muotki. Doppe dáhpahuvai issoras ja surgadis dáhpahus oktii dolin.
Muhtun siiddas ledje vihtta bártni, ja okta jámii giđđat. Čakčat náitalii okta dain vieljain Muotkis. Ja ledje šøittain Muotkis. De šattai seavdnjat go gerge vuolgit. De ledje nuorra šlupput nu ollu mielde, ledje veaháš gárremin. De dadjá okta dain:
– Galggalivčče dál Edvarda boahtit Muotki čoro nalde, vieljas heajaide.
De vulge Muotkis, ja cahkkehedje čuovggaid buollit go manne. Gitta dassái go botnje Gárenjárgga geaži birra sisa. De čuovggat jádde fáhkkestaga. Ja orui boahtime veahka dievva šøitta. De ripme čuovggaid cahkkehallat, muhto eai oačču čuovggaid buollit, vaikko lea goalki. Ja dan barge goakte siidda rádjái, eai oačču čuovggaid buollit. De lea okta boares olmmái šøittas maid. De dadjá:
– Go dii ehpet oaččo čuovggaid cahkkát, de mon vuolggán deahka nala ja cahkkehan čuovggaid, muhto dii ehpet galgga oktage boahtit bajás.
De manai boaris bajáš ja cahkkehii čuovggaid, ja oaččui buollit. De ledje lahka siidda, de fas jádde čuovggat, ja dan stobus mas galge heajaid doallat. De jádde fáhkkestaga čuovggat go søita bođii Gipmiluktii.
De siidaveahka gulle go olbmot vázzet máđoheamit olggobealde stobu. De vuolgá okta boares ahkká geahččat. De go boahtá de čuožžu okta dievdu ja geahčasta čalmmiide. De botnjalii eret čalmmiid. De dovddai dat boares nisu ahte dat leai dat bárdni mii leai jápmán. Ja manai sisa ja muitalii:
– Diein leat jámehat mielde, boahtán Muotkin.
De ripme čuovggaid cahkkehit ja oažžu čuovgga cahkkát. De go lei čuovga buollime, go headjaveahka leai bajás boahtán. De játtai fasttain čuovga, dego livččii olmmoš bosastan. De dadjet dat olbmot:
– Din leat čuvvon jámehat.
De vuot ripme čuovggain bargat, ja ožžu čuovgga buollát. Go čuovga lei buollán, de ráhkkanedje borrat. Ja muhtimat dain nuorra bártniin vulge sisa vázzit siidda guvlui. De bođii veahka ovddal, go bohte Buollándieva ala. De leai ovddimus dat bárdni, mii leai jápmán. De válddii ovtta bárdnái gitta ja dadjá.
– Don leat sihtan mu boahtit heajaide, ja mon lean boahtán, oktan veagainan.
De riemaiga fákkadallat, ja nuppit ballájedje. Ja oaččui avis luovus, ja riemai aviin cábmit. De goit beasai eret ja manai siidii ja bijai nohkkat. De niegada go bođii nihkui.
– Don oaččut giitit go dus leai riehtteavvi, mainna don iežat birgehedjet.
Dán gearddi mon du guđđen, muhto go nuppádis boađán, de don fertet vuolgit mielde. De guokte jagi maŋŋil, bárdni skihppái ja jámii.