PÅ NORSK:
(Muitaleaddji: Halvdan Nilsen)
Go olmmoš heavvana merrii de máhttá dáhpáhuvvat dakkár, mii leat oalát ipmirmeahttun. Jámet háliida girkoeatnamii hávdáduvvot. Jus dat ii dahkko de máhttá dat jápmán olmmoš baldalit ja givssidit olbmuid. Dán vuonas gullo leamaš dakkár imaš dáhpáhus oktii dolin.
Mearrajámet
De lei nisu gávdnan lihka (jámeha). Dat lei golgan gáddái Gámvik (Gáŋgaviika) vearrái, ja lei vuollil ulleráji.
De manai siidii ja muitalii ahte son bođii čáhceliikka guovdu. Dat lea vissa golgan ihkku gáddái. De čoagganedje olbmot ja galge vuolgit viežžat dan eret. De manne dan báikái gos nisu leai bagadallan. Muhto eai gávdnan maidege. De bohte ruoktot ja muitaledje:
– Eai sii gávdnan maidege.
De nisu imaštalai ja dadjá:
– Seamma hal dii ehpet ipmirdan gos mon lean bagadallan.
De dadjá dat boadnji:
– Gal mii dan báikki ipmirdeimmet, mii lea oahpes báiki.
De dadjá dat nisu:
– Vulgot dál mii dohko geahččat.
Nisu manai seammá báikái, muhto ii oaidnán maidege. De riemai imaštallat ahte dat galggai leat jur dán báikkis. De manne ruoktot eaige gávdnan. De bidje nohkkat eahkedis. De go lei velledan veaháš áiggi de rahpasii uksa ja bođii olmmái sisa. De fuobmái nisu bajás, muhto boadnji lossadit nohkai. De jearrá nisu:
– Mii lea ášši?
De dadjá:
– Mon lean dat olmmái mii lean gáddái golgan, ja mon fertejin iežan čiehkat eret din ovddas, dainna go leai okta olmmái mielde, mii ii galgan leat mielde. Mon lean seammá sajis go don iđđes boađat de don gávnnat mu ja galggat bálkestit darfebiehki mu nala.
De jávkkihii dakkaviđe go leai dan sáni dajan. De šattai iđit, de vulggii vázzit. Ja de go niso fuobmái čáhceliika vealláme. Dohppii darfebiehki ja bálkestii nala, ja vázzilii ruoktot. De bođii sisa ja muitalii boadnjásis:
– Dat leai imaš ahte mii eat galgan oaidnit dan čáhceliika, muhto dál mii galgat mannat ja doalvut dan girkoeatnamii.
Ii sihtan riekta jáhkkit, muhto jáhkii goit boadnji maŋemustá. De vulge ja válde fancca. De go bohte dan báikái de oidnet buohkat dan liika ja manne ja válde ja gudde vancii. Ja lihka leai nu varas ahte ii lean álgán ge guohcagit. Dat lei dego easkaládje merrii boahtán. Dolvo dasto girkoeatnamii, eaige dat oaidnán eaige gullan maidege go liika veallái fierváskájan. De niegadii dat áhkká gii lea vuosttažin gávdnan. Niegadii ahte bođii nihkui ja dadjá:
– Don galggat mannat nuortageilui, doppe lea okta unna kássaš, ja das lea din bargobálká.
Ja dadjá olmmái:
– Geat mu dolvo, daidda galgabehtet addit guokte dála ja loahpa galgabehtet ieža atnit.