PÅ NORSK:
(Muitaleaddji: John E. Utsi)
Dát giláš - Vázáš - lea doloža rájis leamáš olbmuid gávnnadanbáiki.
Dáppe ledje gávpeolbmot, main ledje dárbbašlaš dávvirat ja gálvvut, dáppe lei girku gos olbmot náitaledje ja gásttasedje mánáideaset ja dáppe dolle márkaniid, gos olbmot oste, vuvde ja lonohalle gálvvuideaset.
Oktii dolin ledje dán Važáš márkanii boahtán ruošša gávpeolbmát. Sii háliidedje dieđusge dahkat buriid gávppiid sámiiguin. Sin gálvvut ledje láđđit, bivttasávdnasat, ákšut, sahát ja eará ruovdegálvvut.
Olbmot geat bohte geahččat besse oaidnit daid rabas reagaid ja gerresiid siste. Dies olbmot de gehčče ja geahččaladde daid dávviriid, muhtumat oste juoidá, ja earát fas dahke lonuhusgávppiid. Sámiin ledje náhkit, duoljit, guolit, muottát, gistát ja eará sállašat mehciin ja jávrriin.
Eahkes, go sevnnjodii, de heite olbmot dahkame gávppiid. Ja ruoššat guđđe iežaset gálvvuid daid sin reagaid sisa, sii eai oppa beroštan gokčat daid.
Muhto Ipmil várjalus dan guhte duosttai daid guoskahit!
Maŋŋit eahkes, go márkanbáiki lei ávdin ja jaskat, de njágai muhtun olmmái reagaid lusa. Son lei suola ja áiggui bargat suollaga bargguid, namalassii suoládit. Son čohkkii gálvvuid dievva sala ja áiggui njáhkat eret daiguin su suoladávviriiguin.
Muhto de go áiggui vázzát, de son ii beassan ii gosage! Ii máhttán váldit ii ovttage lávkki. Lei dego galbmon gitta dasa reagaid báldii. Vaikko movt geahččalii, de son ii lihkkasan. Nu guhkki go diet galbma dálveidja lei son fertii čuožžut das. Galbmui issorasat, muhto ii ábuhan.
Iđđes árrat, go olbmot bohtet márkanbáikái, de oidnet sii ovtta olbmo čuožžume das. Sus leat gálvvut sala dievva ja lei bealleheggii galbmon. Sii imaštallet gal go son nu árrat áiggui álgit gávpašit. Suolariehpu ii jietnat sáni ge, doarggista ja illá bissu ceaggut.
De boahtá okta dain ruošša gávpeolbmáin dohko. Go oaidná suollaga son giitala su go lea fákten sin reagaid olles ija. Ja de ruošša válddii eret daid gálvvuid maid suola doalai, ja de beasai suola, suoibbu mannat ohcat liegga dálu.
Dan beaivvi šattai márkanis oalle olu sáhka dien suollaga birra. Movt son lei šaddan čuožžut olles buolašija olgun. Das maŋŋil ii lean oktage oaidnán dien suollaga šat.