PÅ NORSK:
(Muitaleaddji: Marit Gaup Eira)
Mu namma lea Joret Máret, lávejit gohčodit mu Šelgon Joreha Márehin, Marit Gaup Eira.
Ná mun ledjen oktii biillain vuodjimen, ledjen vuolgán - dahje moai leimme manjiin, mis lávii eallu dalle dan luotta ala báhkket. Ja de moai leimme manjiin vuolgán geahččat, ledje horstta vel čatnan dakko seakkimus báikki nu ahte dat eai beasa rastá joga. Dat lea dan Ávžejávrri davágeahčen, dakko lea hui seaggi ja olgešbealde lea vel grunnmuvra (boares viessosadji). Ja mii leimmet horsta čatnan diekko dan johkagáddái vai dat eai beasa rastá joga don beallái.
Ja de moai letne manjiin vuolgán vuoddjit biillain ja juste go moai ollime dakko grunnmuvrra buohta jávkkihedje čuovggat mu biillas! Ja mun goazastin, suorganin, goazastin – logan olbmáin: “Ná vuoi hearrá, mo bat moai dál galge, dál lea sevdnjes biila! Munnos eai leat čuovggat!” Fáhkkestaga manne čuovggat ja guovdu luotta moai letne vel.
Ná de mun dál bonjastin dan brytara, ná čuovggat dat gal ihte. De mun gal veahá suorganin, jurddašin, ná juoga hal lei gal die maid dieđusge. Juoga maid mun in leat jáhkkán ja dál vásihin ieš dan – ja de mun gal bessen fas vuoddjit. De moai gal vujiime ja jorggiheimme fasttain ruovttoluotta go oinniime ahte dál eai lean gal bohccot doppe.
Dat lea diekko, dieppe lea grunnmuvra olgešbealde luotta, ja - muhto in mun gal dieđe leat go duođat mun lean gal muitalusaid gullán dan ahte dalle duiskaáigge dalle dat mahkáš olbmo bálkestan dan jávrái, soađiáigge. Ja man duođai dat ležžet?