PÅ NORSK:
(Muitaleaddji: Isak Samuel Hætta)
Dálu bárdni ja ulddaid nieida.
Dán Birtavári guovlluin leat báikkit mas leat hirbmat stuorra geađggit. Muhtumat stuorrát dego dálut. Okta olmmái dáppe lea muitalan go son oktii go son lei váccašeamš, de áicái stuorra dálu. Ja dan son ii lean ovdal oaidnán goassege. Go son vulggii lagabui vázzit. De bođii son daid stuora geđggiid lusa. Son váccii daid birra, ja garvvii daid. Go bođii dohko gos diet dállu galggai leat, de doppe ii lean miige. Vaikko ozai ja váccii birra buot geđggiid de son ii goassege gávdnan dan. Maŋŋil, go bođii ruoktot, de muitalii olbmuide maid son lei vásihan. Ja de dajai okta vuoras: - Na, diet ii lean go ulddaid dállu, man soitet oaidnit.
De leigga guokte bártni láddjeme meahcis. Lei hui fiertu ja beaivvádat. Soai oaččuiga suinniid goikat ja bijaiga daid láhtui. Soai nohkaiga dohko. De oaidná dat nubbi guokte nieidda boahtime. Nuppis lea gákti alde, ja nuppis beaska ges. Nieiddat bođiiga lahka. Nubbe nieida hoigá dan nuppi bártni guvlui ja dadjá: - Die lea du irgi!
Nubbe nieida vástida: - Ii leat mu irgi. Die lea sámibárdni ii ge dat fuola mus dálunieiddas. Dat lea baicca du irgi, dus geas leat bohccot.
Go bárdni lihkasta, de gáidaleaba nieidda guovttos guhkkelii, muhto fas lahkoneaba. De bođiiga hui lahka bártni. Bárdni dohppii dan nieidda mas lei gákti, álggii doallat su. Nieida čierrugođii, muhto bárdni ii luoitte su. De cikcii bárdni nieidda gihtii nu ahte varra vel iđii. Ja go varra ihtá ulddas, de šaddá ulda albma olmmožin. Nieida čierru ain ja váidala: - Go galget mu ges dollet ja varddihit! Dál in šat dohkke eará ulddaid lusa. Bárdni vástida:- Almma moai náitaletne. Nieida dadjá: - Almma don leat sápmelaš?
- In leat sápmelaš, lean dálu-olmmoš, vástidii bárdni.
De soai šiehtaiga náitalit, ja bárdni liikui hui bures ulddaniidii. Nieida lei nu čáppat, bárdni ii lean oaidnán goassege nu čáppa nieidda.
Bárdni vulggii báhpa lusa nieiddain. Son gásttašahtii nieidda, bijai namman Elle ja čálihii gulahusaide. Muhto báhpas lei maiddái nieida, ja sus lei bárdni nai. Báhppa liikui nu bures ulddaniidii, ii lean oaidnán nu čáppa nieidda goassege. Son fállagođii iežas nieidda dálubárdnái, vai su iežas bárdni beasašii náitalit ulddanieiddain: fálai lonohallat nieiddaid. Muhto dálubárdni ii mieđihan báhpa árvalussii ja náitalii ulddanieiddain. De jearrá ulddanieida dálubártnis: movt soai galgaba birget, eai sudnos goit lean gusat, iige eanan. – Dál galggat ráhkadit mihtu, man stuora viesu ja náveha siđat, ja mihtidat eatnama! dajai ulddanieida.
Bárdni mihtidahtii eatnama muhtin čabu rušu jávregáddái. Dat lei skierrái, bovdnái ja rumššas. De soai nohkaiga. Bárdni gullá ihkku go nu vudjet heasttaiguin ja jorgalit gilvineatnama. De šattai iđit. Bárdni vulggii olggos, oaidná go giettis leat buot bovnnat ja skierrit jalggodan eret.
De šattai vuot eahket, soai nohkaiga. De gullá bárdni go nu vudjet heasttaiguin ja bálkot dimbariid, ahte deapmá vel eanan. Go šattai iđit, vulggii bárdni olggos geahččat. Oaidná go dimbarat leat dakkár stuora gubat, nu alladat. Bárdni ii olát geahččat ge daid badjel.
Šattai fas eahket, ja soai nohkaiga. De gullá bárdni go nu ferret ja derpet oktan boŋkkášin, ja sahejit nu ahte šuvvá vel. Šattai iđit ja bárdni vázzái olggos. Oaidná go lea ihtán dakkár stuora gárdin masa láhppui vel go lei siste váccašeame. De bođii su eamit, jearrá: - Manne it boađe boradit?
- Ledjen vuolgán geahččat dán gárdima mii lea dán ija ihtán dása, ja de láhppojin dán gárdima sisa.
Su eamit bohkosii, dollii su gihtii ja láidii su olggos. De jearrá bárdni: - Gean dát lea viessu? Dieđát go don?
- Munno viessu dat lea. Mu vieljat leat buktán dáid dimbariid ja dahkan dan viesu, vástidii su eamit.
Šattai fas idja. De gullá bárdni go nu čullet ja derpet dego ovddit ija nai. Go šattai iđit, de doamai bárdni olggos geahččat. Oaidná go lea ihtán oalle stuora návet, muhto son ii duostan vuolgit okto návehii, balai láhppot dohko. Son manai vissui eamidis lusa ja jearai:
- Gean duo lea návet?
- Munno návet dát lea, vástidii su eamit.
Dálubárdni hástii eamidis vuolgit guoibmin geahččat dan náveha. Soai manaiga sisa. Doppe ledje guoktelogi hiŋgála ja hui stuora sávzalatnja. Manaiga návetloktii. Dat lei hui stuoris. Manaiga heasttastálljii, doppe lei guovtti heastta sadji. Soai vulggiiga ja manaiga vissui.
Šattai vuot eahket, ja soai nohkaiga. De gullá bárdni go gusat muhkot, sávzzat mehkot ja heasttat šnjirgot. Go šattai iđit, de vulggii bárdni geahččat. Návet lei dievva. Doppe ledje guoktelogi gusa, golbmalogi sávzza, guokte heastta ja suoinnit dievva návetlovtta.