PÅ NORSK:
(Muitaleaddji: John E. Utsi)
Guokte vielja bivdiba guovžža.
Dán Jiepmaluovtta mearragátti lássábávttiin leat, duháhiid mielde, hirbmat boares báktesárgumat. Dat leat govat maid dološ olbmot leat sárgun čájehit movt sii elle, bivde ja guolástedje mearas. Muhtumat dain leat badjel 6.000 jagi boarrásat. Dain govain oaidná oalle dávjá ovtta dain deaŧaleamos elliin- guovžža. Dološ oskun lea dat bassi ealli. Ipmilat ledje oainnát bidjan su eatnan ala vákšut ja geahčadit man láhkái olbmot elle. Ja maŋŋil jápmima dat máhcai ruoktot ipmiliid lusa ja muitalii visot maid leai oaidnán.
Muhto olbmot goit bivde dan oalle dávjá. Ja oalle guhká sis ii lean vearjun go sáiti, mainna godde dán bassi heakka. Dá okta muitalus movt máhttá geavvat guovžabivddus:
Oktii leigga guokte vieljaža guovžža bivdime. De soai manaiga, dassážiidda go gávnnaiga guovžža soames soahkeávžžus. Sudnos ii lean eará dorvodiŋga go sáiti. Dalle guovža čuoččahii guovtte juolggi nala ja riemai biškut. De dajai nubbe viellja guvžii: "Álgu fággádallat! " De guovža lahkonii, ja soai riemaiga fággádallat. Ja de bonjastii guovža dan olbmá vuolabeallái ja dettii, dassážii go olmmái dajai: "Luoitte mu bajás!" De guovža luittii su bajás.
De soai álggiiga fas fággádallat. De oaččui olmmái guovžža vuollái ja dettii veaháš gaskka ja siđai vieljas boahtit veahkkin, muhto son ii duostan boahtit vielljasis veahkkin. Son ballái ja manai ruoktot ja guđii vieljas dohko rahčat guovžžain. Viellja čuorvvui dasa, gii ballái: "Ale mana, muhto boađe čugget sáittiin guovžža!" Ii son duostan boahtit.
De son fertii fággádallat guovžžain, dassážii go oaččui guovžža rápmáid guovtte beale stuora soagi gitta iežas gieđaiguin. De son doalai das gitta ovtta jándora. De lei vuolgán viellja geahččat, juogo guovža lea borran su rátná. De son bođii ja oinnii, ahte ii leat vel borahallan su viellja. De dajai dat, gii lei guovžža doallan jándora, nuppe villjii, ahte "boađe mat dál don gis dollet dáidda rápmáide gitta! Mon freisten čugget, guhte duosttan."
De manai dat ballán viellja doallat dan guovžža, ja de go nubbi beasai luovos, de son dajai vielljasis: "Dál oaččut don gis doallat jándora dás dán guovžža, dan bálkán, go ikte ballájit eret ja guđđet mu dása okto." Ja go son lei dan dadjan, de son vulggii ruoktot ja orui doppe jándora, ja de son vulggii fas vielljasis veahkkin.
Ja go bođii dohko, de lei su viellja juo váiban bealleheggii doallat dan guovžža, muhto ii son duostan luoitit, amas ii borahallat. De manai nubbi, dat gii bođii goađi luhtte, njuolga nala ja čuggii sáittiin čađa guovžža ja dettii, dassá go guovža jámii.
De son dajai vielljasis: "Bija don dál njuoska muitui, ahte ale don eret vuolgge, go mon siđan boahtit allasan veahkkin!" De dajai nubbi: "It don livččii dárbbahan jur nu guhká mu doalahit; mus leat dál gieđat nu bákčasat, ahte mon in goit dál sáhte veahkkin njuovvat dán guovžža." De fas dajai nubbi: "Vare livččii vel bákčaseappot, dan dihte don doiste muittát, ahte it vuolgge eret, go oainnát mus dárbbu, dego livččot jur vieris!" De vástidii nubbi: "Vare don livččot leamaš dán manjit jándora doallame; it don fal nu humale!" De dajai nubbi: "Mon lean várjalan iežan heakka ja du heakka."