PÅ NORSK:
(Muitaleaddji: Tor Nilsen)
It dat leat go 50 jagi dan rájes go lea dáhpáhuvvan dát. Dás vuolábealde mu.
Lei ránnjábárra mii orui das. Dat leai Jørgen ja Janne daid namma. Sudnos lei geasseorohat doppe vuovddis, Čearpmatgiettis. Giđđat dat láveje fárret gusaiguin bajás ja de orro doppe gitta Suoidnemánnui, go bohte fas bodnái. Sii elle doppe geasseorohagas. Mii leimmet johtime bajás. Ja ledje golbma gusa.
Ja bođiimet goasi dohko geasseorohahkii, de ravggai okta dain gusain johkii. Dat lei mihcamáráigi ja ollu čáhci jogas, dat lei dulvi. Jørgen lei dakkár stuora olmmái, dat válddii beare dan gusa biellobáddái ja rohttii dan bajás doppe jogas. Ii dat govdon dat gussa, dat čuoččui das johkagáttis, muhto ii beassan bajás.
Ja-ja, mii manaimet dohko bajás Čearpmatgieddái ,gos dat lei dat geasseorohat, ja dat guhtot dat gusat das giettis, das eahkedis válde daid sisa, daid gusaid. Muhto dat gussa, dat ii lean dearvvas, dat lei leamaš das jogas ja lei juoga dáhpáhuvvan dainna. Muhto dat válde gusaid sisa ja go Janne galggai bohčit eahkedis das ii lean mielki. Ii das lean mihkkege ge, eai jurddašan nu ollu das.
Nuppi beaivvi manne iđidis návehii ja galge bohčit, de lei bihtás mielki dan gusas. Muhto ii dat bohčán. Dat luite olggos dasa gieddái ja de šattai nubbe eahket. Dat lei leamaš daid eará gusaid fárus ja jorran das giettis. De ii boahtán ge dat gussa návehii eahkedis dahje goahtái. Vulggiiga ohcat dan gusa meahcis, eaba soai gávdnan dan gusa gostege.
Go bođiiga ruoktot doppe, de oaidniba, de čuožžu gussa das, goađeluhtte ja galgá sisa. Ja dat lea vielgat dat gussa. Muhto eaba soai bidjan dan gusa sisa. Dat čuoččui das dat gussa olggobealde, čuoččui olles ija das návet olggobealde, dakkár goađi olggobealde.
Ja iđđes de lohká Janna, son gal bohčá dan gusa, geahččá. Muhto smiehttá: lea go dat albma gussa? Go dat lei nu vielgat, nu fiinna gussa. Jo, Janna božii dan gusa, das leai valjit mielki. Go luittiiga daid eará guokte gusa olggos dat manai dat vilges gussa daiguin dohko meahccái. Ja eahkedis dat bođii ruoktot. Ja dat válde dan návehii ja dat lei olles geasi doppe dat gussa. Ja olbmot dihte, dat lohke dat lei háldegussa, ii lean dađi eanet, dat leai háldegussa.
De šattai dat áigi go galge vuolgit bodnái suidnet deike vulos. Ja mon ledjen vuohtin veahkkin viežžat bodnái daid gusaid. Dat lei sádden sáni mon galggan boahtit Jannai guoibmin doalvut daid gusaid bodnái. Jørgen lei illástan spirraliid, ja vujii dasto heasttain. Ja moai Jannain moai galge johtit daiguin gusaiguin. Ja das lei áidi vuolábealde dan geasseorohaga. Das ledje guokte muora mat manne rastá bálgá gos mii vujiimet heasttain. Ja lohká Jørgen: - Go mii vuodjit meaddel das, de mon galggan hoigadit daid ráviid eret dan áiddis, nu ahte dat lea rabas. Das ii galgga leat áidi go son ii leat doppe. Dat galgá rabas dat áidi. Das lea guohtunáidi das bajás. Na juo, dat vujii čađa dan áiddi, ja mon válden eret daid muoraid ja bidjen daid dohko, gosa son leai bagadallan. Gosa mon galgen bidjat daid. Ja de mii johttáimet vulos. Ja gusat dat mannet.
Ja go mii boahtit bajás de lea dakkár roggi, dakkár dearbmi. Ja dat manne dan roggái dat gusat. Eai dat oidnon. Ja dat vilges gussa lea mielde. Ja go mii dasto jovssaimet daid gusaid, das vuolábealde, de ii lean dat vilges gussa daid fárus šat. Ja Janna lei čatnan liinni dan gussii ovdal go bijai návehii ovdal go bidjá návehii. Lei čatnan iežas liinni birra čeabeha, dan gussii. Ja go mii bođiimet dan roggái, de lea dat liidni dan rokkis. Ja go mii jovssaimet daid gusaid. De ii lean dat vilges gussa daid fárus. Muhto dat su iežas gussa, mii giđđat leai láhppon. Dat lei daid fárus. Ja liidni veallá das rokkis. Ja mus lea dat liidni. Ja logai Janna mon galggan váldit dan liinni. Ja mon válden dan. Ja olbmot lohke: - Jo, dat lei háldegussa, ii lean dađi eanet. Dat lei buorre muitalus. Jáhkkos dat gii jáhkká!