PÅ NORSK:
(Muitaleaddji: John E. Utsi)
Dološ čuoikkaid birra:
Čuoikaluovtčohkká lea dan vári namma mii lea dás davábealde. Boazosámit gal atnet čuoika lea oalle buorre divrráš, geasset dat čohkke ealuid ja boazovázzis lea dasto oalle álki gávdnat daid su bohccuid. Ná čálii dološ girječálli, Turi Johan, čuoikkaid boahtimis Sápmái:
Sámeeatnamis eai lean álggos ollenge čuoikkat, dušše Látteeatnamis fal ledje čuoikkat. De árvališgohte čuoikkat, ahte sii vulget dál geahččat dan muitalus Sámeeatnama, maid sii ledje heavnnis gullan, gii leai ruohttan Sámeeatnamis ja muitalan čuoikkaide, ahte doppe lea hui buorre orrut, doppe leat hui ollu bohccot ja beatnagat ja gáiccat ja buhkát ja feara mat smávva ealibat, main eai leat ollenge goađit eai ge matge sujiid. Ja dat sápmelaččat ođđet beare rabas olgun. Muhto dan dat ii heavdni muitalan eará go dan dihte, ahte jus son oažžu čuoikkaid dohko vuolgit, de son beassá boagustit, man jallat sii juo galget ge leahkit, go vulget dohko, gosa son sihtá, eai ge jurdil veaháš ge dan bearrái, ahte "go mon lean Sámeeatnamis, de mon goit gođán nu fiinna firpmiid juovaide ja soahkegaskkaide ja juohke báikái, gos čuoika orru, ahte sii eai goit oainne eai veaháš ge, ovdal go leat darvánan fierbmái gitta, ja de mon viehkalan soames árppu mielde lusa ja gálgalan luovos ja boran eret dego dalle nai, go ledjen Látteeatnamis."
Na, de goit čuoikkat hutke, vulget go dat hal sii visožit dohko dan Sámeeatnamii oktanaga. De dajai čuoikkaid eadni, ahte ii dat soaba visot vuolgit, muhto álggus bidjat dušše golbmasa iskat, makkár dat lea Sámeeatnan. Na, de dat vulge guđas dal iskat dan Sámeeatnama. De sii dal manne dohko, muhto dohko leai fal oppa guhkki. De okta čuoika váibbai, ovdal go ollii sámiid rádjái. De son gávnnai ovtta čearpmaha, mii leai maid váiban sápmelaččaid ealus, go sii ledje johtime iežaset eatnamii. De leai čearpmatriehpu nohkkan beaivvádahkan soames rápmii. De gávnnai dot čuoika, mii leai juo váiban, dan čearpmaha, ja máid son dagai, dan heakka čuoika? De seaivvui jur čearpmaha biežageahčái ja riemai njammat das vara, ja go son gallánii, de son girdilii nuppe geahčái čearpmaha ja seaivvui jur juste čalmmi nala ja galggai dal vuoiŋŋastit das. Na, go čearpmat gullái, ahte sus riemai čalbmi sakŋidit, de son ravkalii čalmmis, de čuoikkas bávččagii juolgi jur sakka. De son vulggii eret čalmmi nalde ja manai jur njunneráiggi ovdii. Na, de go čearpmat vuoiŋŋadii, de son doaivvui, ahte dál lea láfubiegga, ii ge son girdilan eret. De bođii čurot ja runiidii čearpmaha bealljeráigái, de snuđádii čearpmat ja ristestii (bardilii) oaivvis. De čuoika ravggai nu guhkás dakŋasiid sisa, ahte ii oidnon ge, muhto de dat fal ruohtastii čearpmat nai nu, ahte bieža dušše sparaidii, ja manai rođu sisa rásiid guohtut.
Na, dat vihtta čuoikka fal ollejedje Sámeeatnamii; muhto de okta hohkai mielkenáhppái, ja nubbi hávkkai suova sisa, ja goalmmát dat šattai boares gerega juolgegaskii ja hohkai dohko; ja guokte besse ruoktot Látteeatnamii ja muitaledje, ahte gal doppe fal lei hui buorre orrut muđui, muhto de leat nu ollu sorbmebáikkit. De muitaleigga dat guovttos, geat leaigga boahtán Sámeeatnamis, movt dat sudno rátnát hohkke. De dajai čuoikaeadni: "Na, dohko ii vuolgge eará go čurot, mii lea várrogas." De dajaiga dot guovttos: "Gal doppe birge, go sii visožit vulget."
Na, de sii vulge visožit, ja go bohte Sámeeatnamii, de sii gávdne ovtta vuovddis ealu juohke rokkis. De sis ii oktage diehtán, mat dat leat ealibiid dat mat leat nu ollu. De fuobmái okta, ahte dat leat dal dat heavnni muitalus bohccot. De sii girddáldahte dan ealu ja dolvo várrečohkkii.