PÅ NORSK:
(Muitaleaddji: John E. Utsi)
Dat lea muitalus, man muhtun sárdneolmmái muitalii munnje. Dat lea dáhpáhuvvan dáppe Ivgubađas.
Juohke geasi ledje girkobasit ja dohko ledje ollu olbmot čoahkkanan ja nu maid ledje máŋga sárdneolbmá boahtán deike, Ipmil-sáni sárdnidit.
Rohkosat ledje máŋga beaivvi. Visot dálut, hoteallat ja hyttat ledje dievva gussiiguin. Dat lei stuorra deaivvadeapmi risttalaš olbmuiguin. Ja ledje vel ožžon ovtta dain boarrásit sárdneolbmáin maid boahtit deike, son lei gullon leat oalle čeahppi sárdnidit. Dat dovddus sárdneolmmái bođii eamidiinnis ja oaččuiga orrut muhtun dálus girku bálddas.
Eahket bođii ja sárdneolmmái ja su eamit bijaiga nohkkat. Jur leaba nohkkame go soai gullaba go juoga dearpá uvssa duohken olggobealde. Sárdneolmmái manná nagirčalmmiin rahpat uvssa. Jáhkká dat lea sudno girkoverdde, mii heađis boahtá su lusa ijas. Go rabista uvssa, doppe ii oidno ii miihkkege, muhto son dovdá galbma njuoska leavttu, mii boahtá sisa ja manná su meaddel ja manná dohko su eamida lusa oađđenlatnjii.
Eamit, mii lea ain seaŋggas, oažžu dan galbma vuoiŋŋa iežas nala ja ballá hirbmosit ja biškáda. Sárdneolmmái sihtá eamida jođánit váldit sálbmagirjji, mii lea dies beavdeguoras, askái. Ieš son lohká Ipmila sáni ja dohppe postilla girjji gihtii ja geahččala dainna duvdit eret dien galbma, oaidnemeahttun sielu, mii lea eamida luhtte. Áibmu dan lanjas lea ráimmahallan ja lossat lea vuoigŋat. Dat juoga, mii lea boahtán sisa, ii gal dáhto sudnuide buori, jurdila sárdneolmmái. Áigu vaikko váldit munno heakka, jurdila son.
Garra jienain son geahččala gohččut dien bahá jávket eret. Ipmil sániiguin son rohkadallá ja sárdnu. Muhto ii dat ábut. Guhkes ija sárdneolmmái ja su eamit ferteba lávlut sálmmaid ja lohkat Ipmila sivdnádusa ja olles evangeliuma. Easka iđitbeallai dat fáhkka jávká, láhppo čoavddaráiggi čađa.
Sárdneolmmái ja su eamit beassaba jur bosihit, ovdalgo fas gullaba hirbmat jienaid uvssa duohken, ja láse duohken oidno čáhppes suoivvan ja olles dállu smiergá ja gihčá. Go láhtti lávddit álget loktanaddat, dego doppe vuolde lea juoga mii viggá čađa boahtit bajás, de gal sárdneolmmái ja su eamit hoahpus viehkaleaba olggos ja gárgideaba dan dáložis.
Dan beaivvi doallá sárdneolmmái sártni girkus. Son muitala láhppon sieluid birra. Ja su sáhka lea dakkár man olbmot gal eai vuos veaje vajálduhttán. Olbmuid mielas son leai erenoamáš čeahppi sárdnidit ja muitalit biru, gáđohusa ja helveha birra.
Maŋŋil muitala sárdneolmmái su ustibiidda ahte ollu son gal lea oaidnán dán máilmmis, muhto nu garra ja váralaš fámuiguin son ii gal leat agiinis ovdal gávnnadan. Go ii - bahán - Ipmil sátnige bastan dan eret bidjat. Ja, dajai sárdneolmmái, dien lanjas ii galgga gal giige šat ijastit.
Moadde jagi maŋŋil vuvdojuvvui diet báiki ja dat dáloš fievrriduvvui muhton várrái. Ja Ipmil várjalus dan olbmo, gii doppe áigu ijastit.