PÅ NORSK:
(Muitaleaddji: Berit Anne Siri)
Biret Anne Siri orru dán Ulisullo láhkosis gesiid áigge. Ja jo mánnán son lea gullan muitalusaid ja máidnasiid daid gullon ulddaid birra. Ieš gal Biret Anne ii loga oaidnán daid goassege, muhto lea gal gullan ollu fearániid go olbmot leat gávnnadan daiguin eatnanvuolážiiguin.
Na, in mun dieđe lea go dat duohta: Na, Áttanis ledje nu olu mánát. Ipmil galggai boahtit geahččat daid mánáid, muhto dasa lei nu heahpat ahte čiegaid daid mánáid. Doaivvui Ipmil ii dieđe daid mánáid. Ja go dat de bođii:
“Na, gos dus eará mánát leat?”
Ná, dajai Ipmil:
“Ná gal dat ožžot leat eatnanvuolašolmmožin, go juo čiehkan leat daid mánáid.”
Ná dat lávii min... mu viellja muitalit, dat boarráseamos viellja... ahte dat lei dál áddjá mii lei láhppogásas. Dat - ii hal dat lean gal eambbo jándora láhppogásas. Nu, ja de lea mannan dohko vázzit dieváid mielde ja de oaidná: Ná gea, viessu go dáppe leage?
Na, dat de manai dan viesolusa. Bođii olmmoš olggos dan viesus ja lohká:
“Boađe sisa!”
Ná son manai... son manai gal sisa. Dat gal fállá sutnje njálgáid. Ii son fuollan. De logai: “Áiggot go don borrat?”
Nu steikejit (basset) guliid... rávdduid.
“It go don áiggo?”
Ii son áiggo, fuola maidege.
Na, hui boares čurges áddjá čohkka dan... dat lea dego omman das. Lohká: “Bálkestehpet olggos dan! Bálkestehpet olggos dan! Ii dat oaččo deike boahtit!”
Na, dat dat gal de bidje olggos dan.
Nu, na dat dal vulggii, dat bártnáš. Ii dat gávnna ruovttu. Ja dat vázzá juohkesajes ja ii dat dat gávnna daid gođiid. Ja dat orro gal dat báiki, die dat lea gal, dieppe dat goađit, muhto eai dat leat doppe dat goađit.
De oaidná die boahtá, vuojeha čorraga, de lea nissonolmmoš. Bođii dan bártnáža guovdu. Lohká:
“Maid don ozat de?”
“Mun in gávnna min goađi!”
Lohká: “Ná mana dien dieva nala, gal don de goit oainnát!”
Lohká: “Doppe ii leat!”
Son lea leamaš dien dieva nalde.
Lohka: “Ná go don dál manat, gal don dál goit oainnát dan goađi.”
De manai dohko, ná dal dat gal oinnii. De gal fuobmájedje doppe goađe luhtte:
“Ná do, gea do lea Ásllat.”
De viehkalii ja gahčai... gahčai gasku joga gopmut, ovdal beasai mannat dakko rastá. Na, dan mun in dieđe šat leago duohta, muhto nu goit lea.