PÅ NORSK:
(Muitaleaddji: Isak Samuel Hætta)
Muhtun olbmot ledje geasset suidneme Leaibevuona badjin. De boahtigođii arveoakti ja sii manne báktegurrii, čohkkede dasa.
Sidjiide boahtigohte dego nahkárat ja sii oađestuvve das veahá. Fáhkkestaga sii fuomášit ahte sii leat viesu siste. Doppe lei nuorra nieida ja boares áhkku, ja viessu lei čáppat ja čorgat. Sii čužžot das uksaguoras dan viesus. Beavddi alde leat borramušat. De dadjá dat boares áhkku sidjiide:
-Bohtet dál beavdái borrat!
Dat boarráseamos dain nissonolbmuin geat dál ledje rohttahuvvan háldiid vissui, nordada duon guoktása gardnjiliin, ahte alli juo mana dohko beavddi lusa!
De muitalii háldeáhkku:
-Dievddut eai leat dáppe ruovttus, sii leat mannan gávpogii oastit headjabiktasiid ja borramušaid. Háldi nieida galgá náitalit, ja sis leat ránnját das lahka.
Háldi viesus ledje ollu čiŋat, čáppa biktasat ja liinnit beavdeguoras. De fállagođii háldeáhkku duoidda olbmuide:
-Bohtet geahččat dáid!
Guovttis dain nissonolbmuin jur nu milohallaba vuolgit geahččat čiŋaid, muhto dat goalmmát duvdila sudno gargŋiliin ahte ii mannat fal geahččat daid!
De gal suhtihii háldeáhkku, bođii sin lusa ja salastii buot golbmasa oktanaga, hoigadii sin fáhkkestaga eret. Ja dalle ba sii ledje veallut das jeakkis bákteguoras.