PÅ NORSK:
(Muitaleaddji: Per L. Boine)
Oktii vulggii okta boares áddjá meara ala guliid oaggut. Go son lei oggon fatnasii measta lástii, de jurddašii don gáddái vuolgit. Jurdilii dattetge fas ain:
“Manne son mun in velá oakkos alccesan vuoššan-guoli, beasan liemastit go boađán gáddái?”
Son luittii su váđus bodnái, dovddai ahte dasa darvánii stuoralágan guolli gitta, gesii dan bájas, geahčestii:
“Vuoi, gáfat dette! Josku maid, alas mánná vuogga njunis gitta.”
Doapmalii hoahpus luoitit dan fas merrii, de mánná hállagođii:
“Ále luoitte mu šat merrii! It don šatta gáhtat, jus mu leat geassán bajás botnis, dasgo duonddat ledje mu dohko deaddán ja de viimmat bessen olbmuid lusa.”
Áddjá suhkalii gáddái maŋŋel go lei čohkkedahttán gándda maŋŋeskohttasii. Go son suhkká oanehažžii ja vilppastii gándda guvlui, de gánda lea sturron mealgat ja ollu dan rájes go son maŋemus vilppastii sutnje. Ja go gáddái leigga joavdán, de lei gánda stuorat go dábálaš almmái.
Dat almmái, Stihka-Biera lei su namma – nu go son ieš áddjái su nama čilgii, soai árvaleigga dalle ádjáin guoli vuoššastit ja áddjá dajai Stihka-Bierai:
“Manne don guhte leat nuorra olmmoš it mana guliin bajás ja vuoššá munnuide varas guoli?”
Stihka-Biera dagai nu, válddii áddjá gárbá, oktan guliiguin, ja guttii stobu lusa ja vuoššái buot daid guliid liemasruitun. De čurvii ádjái:
“Boađe don ge varas guoli njávggestit!”
Go áddjá bođii ja oinnii daid meanuid, de hirpmástuvai ja jurdilii:
“Vuoi, go gessen dan bahákasa bájas!”
Álggiiga borrat ja áddjáriehpu ii geargan go guokte časká borrat, de Stihka-Biera lei njehkkon buot daid guliid, máid lei vuoššán. Áddjá álggii árvalit Stihka-Bierain:
“Muđui don gal livččet hágás skibir, muhto in suitte dutnje nealgáda doallat. Dás eai lean gusto dutnje guolit oba gallás ge.”
Stihka-Biera dadjá áddjái:
“Gal moai otne veaigin fas fitne oaggume dan mađe guliid, muhto dus lea fanas jur nu menddo uhcci. Jus dus livčče fiellut, de mun vuovžžášin, dahje jus don dieđát dáppe lahkosiin stuora femberega ("Fembøring") maid máhtášit alccet luoikkahit, vai livččii váivvi veara meara alde suhkalit.”
Stihka-Biera heŋgii moaddelogi vuokka, oktan háŋggain.
Áddjá lohka:
“Gos moai seavtti galge alcceseamet fitnet?”
Stihka-Biera vástidii:
“Gal hal dan mearas leat guolit nu eatnat ahte soames roahkkasa dan háŋkii gitta, vai oččošeimme alcceseamet seavtti.”
Nu soai vulggiiga fávlái. Go soai bođiiga oaggunmáhttái, de álggii Stihka-Biera oaggut seavttegis vuokkaiguin. Ádjá gohčui son dušše fal geahččat movt nuorra olmmoš oaggut láve. Son álggi geassit virkosit guliid bájas, logenáre dahje nuppelohkái ain oktanaga, ja dan botta go son váđus luoitá bodnái vuodjut, de orru áddjá mielas ahte dat guolit, mat fatnasis leat lassánit eanet-aht`-eanet.
Eaba soai ádjánan guhká ovdal go dievvagođii fanas ja go gáddái suhkaleigga, de šattai fanas ain buorebut lástii (buorebut guorbmi).
Stihka-Biera dadjá go gáddái bođiiga:
“Gal dat dat ge fanas lea suvddiheapmi, in de geargan oba bivastuvvat ge. Vuokkat dat leat nu čađačalmmagat mus ahte go guolli daid áicá, de guhkkin jo girddiha daid lusa.”
Nu dagaiga soai moatteháve ja ádjás ledje fargga guolit dan mađe go máhtii oažžut alcceseaset lonuhit daiguin jagi ealáhusa.
Stihka-Biera fidni alcces fatnasa, son lei namalassii ádjá bokte skihkkehan alcces fielluid ja dainna juoiggai son alcces fatnasa. Son gávnnai - go lei vázzime muhtin mearragátti mielde - boares treaggaleakka mas ii lean go okta bátni: Das juoiggai son alcces stuora, bastilis miehki.
Son vulggii dainna fatnasiin suhkát gáddeguora ja bođi ovtta báikái, gokko ledje ollu soarvvit ja oaidná muhtin olbmá, guhte gaikkoda soarveovssiid gieđaiguin. Čurvii doppe fatnasis:
“Hei, hei, dan olbmo, go lea jo gievra!” “
Stihka-Biera lea vel gievrrat go mun!” Vástidii dat olmmái.
“Boađe mu fatnasii!” Čurvii velá Stihka-Biera ja nu šattaiga guovttis.
Soai vulggiiga ain suhkkát viidáseappot ja oinniiga olbmo bávtti gieđaiguin gaikkodeame.
“Hei, hei dan olbmo, go lea gievra!”
“Stihka-Biera lea vel gievrrabut go mun!” Vástidii dat almmái.
“It go don mu fatnasii boađáše, munnje skihpárin?” Celkkii Stihka-Biera. Ja de sii šadde golmmas.
Sii vulge ain suhkat. De oidne sii go muhtin almmái ruvve stálli gieđaid gaskas, dego dipma dáiggi.
“Hei, hei, dan olbmo, go lea gievra, go stálli máhttá leat du gaccaid gaskas dego dáigi!”
“Stihka-Biera lea vel gievrrat go mun!” vástidii dat almmái.
“It go mu fatnasii boađe don ge?” jearralii Stihka-Biera. Dan láhkai sii šadde njealjis.
Sii vulge ain suhkát mearragátti mielde, de bođii vuotna sin ovdii. Dan vutnii golggai stuora deatnu. Sii vulge dan deanu mielde bájas: njeallje návccahis duona.
“Ii leat diehttu goastat go mii oba ollen ge dan deanu mielde bájas. Leat go dis makkárge vearjoláganat? Jus máhkaš dappe ipmil láhji mielde oidnosii čájeha, mainna máhtášii olmmoš bájas dan oaččut?” celkkii Stihka-Biera.
Go sii ledje oanehažžii mátkkoštan, de roahkkasii fanas gitta.
“Na, ehpet go dii dádjat deatnoráigge bájas johtit?” celkkii Stihka-Biera. “Hoigadehpet fatnasa luovos vai ain goastat!”
Dat albmat hoigadedje gal, muhto fanas ii lihkkas.
“Jus de leaš geađgi bastan giellasii gitta? Go ii máhte lihkkasit ii eisege šat.” celkkii dat almmái.
“Guovllastehket badjel fanasravdda masa dat fanas nu sakka darvánii!” celkkii Stihka-Biera.
Sii geahččagohte. Josku máid: stuora hávga lea leamaš gárgogoakŋidis beaivvádahkan oađđime ja sii gorgŋo hávgga niskki ala fatnasa gitta.
“Amma de sáddii midjiide vuššosa?” celkkii Stihka-Biera. “Nagoda go dis oktage dan sorbmet?” celkkii Stihka-Biera.
Sii geahččaledje buohkat, muhto ii nagodan oktage sis dahkat dan, earet go Stihka-Biera. Son gottii dan ja gesii gáddái.
“Vuoššát go mii alcceseamet gaskabeaimállása?” celkkii Stihka-Biera.
"Guhtemuš dan galggašii čollet?" árvaledje sii buohkat. “
Fidnejeaddji gieđat leat čábbásepmosat,” celkkii sis muhtin.
Stihka-Biera čuohpai dan hávgga ruitui, máid son lei reaŋgga bánis juoigan. Sii borre buohkat ja gallánedje.
Go sii vuolgigohte fas fatnasii áicái Stihka-Biera dan hávgga oaivvi gárggus. Fáhtii olloliidda gitta ja de hálada das:
“Mii son dainna ge boađášii, go dál máhkaš livčče čeahpes olbmo gihtii, fuomášeaddji ovdii ja máhtolačča gazzii? Gal hal dan siste orošii dal ain ávnnas, muhto lea velá olggos válddekeahttá.”
“Ii guoli dávttiin boađe ii mihkke ge!” Vástidedje sii.
“Ale vuos ain, mun geahčestan veahá dárkileappot šaddá go áitot das mihkke ge!” celkkii Stihka-Biera. Jorahalai ja geahčadii:
“Oho, mánát! Das lea šiega čuojanas, muhto ehpet dii dovdda dan!” celkkii Stihka-Biera.
Álggii juoiggastallat ja go lei oanehaš áiggi juoigan, de buljihii hávgga njálbmeráiggis olggos čáppa ja ođđa fioliidna.
“Geahča duo! Ii go lean ávnnas dan oaivve siste?” celkkii Stihka-Biera.
Go sii álge geahččat dan oaivvi de ledje ollolat jávkán eret.
“Geahčalehpet, albmát, sáhttebehtet go dii čuojahit rievttes ávdnasiin?” celkkii Stihka-Biera.
Sii geahččaledje buohkat, muhto jietna lei roavis ja fastti, dego bahás ráhkevuovssis ja maŋážassii ii oba šat jienádan ge.
Stihka-Biera čohkkedii geađggi ala ja geahččagođii su suorpmaidis ja álggii daid sojahallat, vai dat lášmoduvvot. Go son dovddai ahte dat ledje juo lášmmoduvvon – dan mađe go galget, de bahkonassii čohkkádettiin:
“Bohtos dál gullát juohkehaš! Guhte ii leš ovdal velá gullán čuojanasa čáppa jiena! Sálmmas liekkus nuohta, lávlagis čáppa hulanasa!”
Válddii čuojanasa giehtasis, njáhkalii moalkut čippis guvlui ja bijai čeabeha máhccut ja divui bealljis stráŋgga guvlui, vai beallji nuohta vuhtii váldá.
Ii son dárbbašan guhka čuojahit ovdal go álge meahci návddit čoahkkái boahtit. Juohkelágan návddit bohte. Rieban fertii mohkiidis guođđit, gumpe ii astan sallaša šat doarridit, guovža guđii luomejeakkis – muhto maiddai áibmolottit nu go suhkkes muohtaoakti (bohte). Gullui vel gitta guoli ássanbáikkiide. Guolli vulggii loaiddustis eret, lihkahalai virkosit iežas beahceha, vai joavddašii dohko gos čáppa čuojanas gullo.
Stihka-Biera čuojahii, iige seastán nuohta. Gal das hávgaoalul čuojai, skiláidedje hávgabánit, báhkkodalai guoli beahcet, šnjiraidedje čielgedávttit. Ii lean oidnon, ii ge lean gullon dan čuvges áimmu siste oktage olmmoš dakkár, guhte čábbábut čuojahii, máhtii čielgasabbot lávlut, sáhtii buorebut sániid addit. Ii lean guhka ovdal go Stihka-Bieras álge gatnjalat golgat go son lávlludettiin muitalii dan vártnuhis dilis čáze vuolde ovdal go áddjá su bájas gesii.
Heittii fargga čuojaheames ja báhkkui daid sániid:
“De áiggun vuolgit bálkká máksit! Addit fas ain loana ruoktot! Suovvat sutnje seamma buori, gii mu sáddii vártnuhisvuhtii ja mu bijai guliid gaskii!”
Guđii dan čuojahangeađggi ja guđii buot daid čoagganan spiriid, geat ledje boahtán gullan dihte hávskes jiena.
Stihka-Biera geahčestalai bajás almmi guvlui, geahčastalai birra váriide, arválii:
“Ii go biegga leat dal guđege guovllus?”
Álggii juoigat alcceseaset borjadaga. Ii dárbbašan guhka juoigat ovdal go bieggagođii doppe gos vuogas biegga lei, mii máhtii su fievrredit sugatkeahttá dohko gosa son ieš dáhtui. Go dasto lei boahtán biegga nu ollu go son alcces sávai, vulggii son borjjastit mieđas ja jávkkai dohko nu ahte ii šat goasse ge eambbo oidnon.