Kjende personar i Aurland

Per Sivle (1857-1904) er ein av dei store nynorskdiktarane.

Kongevitjingar i Aurland

Stortingsrepresentantar frå Aurland

Kjende personar i Aurland fødde før år 1850

Personar fødde etter år 1850:

Omtalane er ordna etter fødselsår.

Mons Klingenberg Gjerløv

(1850-1936) frå Aurland, busett i Oslo og Skien. Redaktør og forfattar. Arbeidde som journalist og redaktør i Oslo, og frå 1884 redaktør for avisa «Fremskridt» i Skien. Har gjeve ut romanane «I Forbigaaende» (1880), «Ilgods» (1883), «Fra Skridt til Gallop» (1890) og «Reisegods» (1896).

Torleif Torsteinson Fretheim

(1851-1894) frå Flåm, busett m.a. i Fjell i Hordaland. Cand. theol. og politikar (Moderate). Var vararepresentant på Stortinget for Søndre Bergenhus amt (Hordaland) 1892-1894. Son til Torstein Guttormsen Fretheim.

Fredrik Hiorth

(1851-1923. Industrimann og «fossespekulant» frå Oslo.

Eilert Patric Juul

(1852-1928) frå Kristiansund, busett m.a. i Stryn og Aurland. Prest og skulestyrar.

Jens Sigfred Hopstock

(1853-1924) frå Bergen. Ingeniør og norsk telefonpionér som i 1892 fekk bygd telefonlina Voss-Gudvangen, og lanserte elektrisk jernbane Voss-Stalheim i 1895. Sjå Jens Sigfred Hopstock under Vik kommune.

Haakon Fretheim

(1854-1924) frå Flåm. Lege og hotelleigar.

Lars Vikesland

(1855-1927) frå Aurland. Lærar. Han vart kjend som ein uvanleg god reknemeister, og ein mann med «klisterhjerne». Sjølv ikkje matematikkprofessorar kunne setje han fast med kompliserte reknestykke. Virkesland kunne sitere store deler av Bibelen ordrett på engelsk, og lærte seg m.a. lappisk språk.

Øistein Underdal

(1856-1943) frå Undredal. Bonde, tobakksdyrkar og politikar.

Per Sivle

(1857-1904) Diktar og pressemann.

Olav Sævartveit.

Olav Sævartveit

(1863-1945) Frå Hardanger, busett i Flåm. Lærar og politikar. Ordførar i Aurland 1908-1925. Vart i 1923 vald som den første folkevalde som tok over møteleiinga i fylkestinget i Sogn og Fjordane. Fram til då hadde fylkesmannen styrt møta.

Ragnvald Blakstad

(1866-1929) i Asker, busett i Skien og seinare Arendal og Oslo. Fossekjøpar og industrimann som spela ei av dei sentrale rollene i Noreg i dei første åra då fossekrafta vart utnytta til bygging av ny industri.

Peder Lahlum

(fødd 1871) frå Bergen. Jernbaneingeniør og anleggsleiar på Flåmsbana.

Georg Tobias Flom

(1871-1959) stamma frå Flåm, busett i USA. Professor i norrøn filologi. Faren emigrerte i 1844. Flom studerte gamalnorsk og norske målføre, og skreiv m.a. fleire avhandlingar om Aurlands-målet i «Scandinavian Studies».

Ingolf Christensen

(1872–1943) frå Førde. Jurist og offiser. Fylkesmann og Høgre-politikar. Sjå Ingolf Christensen under Førde kommune.

Nils Gregoriussen Tveranger

(1874-1954) frå Solund, busett i Aurland. Skofabrikant og den første som starta fabrikasjon av den vidgjetne Aurlandsskoen. Sjå Nils Gregoriussen Tveranger under Solund kommune.

Einar Langberg

(1875-1925) frå Stavanger, busett på Hermansverk.

Bottolf Monsson Thunshelle

(1883-1968) frå Aurland. Småbrukar og Arbeidarpartipolitikar. Styremedlem i Sogn og Fjordane Arbeidarparti 1927–1938 og i representantskapet i Norsk Arbeidsmannsforbund frå 1945. Vararepr. på Stortinget 1934-1945.