| | |
| Fakta om Sogndal | |
|---|---|
| Areal: 746 km² | |
| Folketal: 7477 (1.1. 2013) | |
| Høgste fjell: Suphellenipa 1713 m.o.h. | |
| Ordførar: Jarle Aarvoll, Arbeidarpartiet | |
| Tettstader: Sogndal (4114 innb.), Kaupanger, Fjærland. | |
Sogndal er regionsenter for indre Sogn og den viktigaste skulestaden i Sogn og Fjordane. Bygda har sidan 1960-åra hatt lærarskule, og frå 1970-talet har Sogndal vore hovudsete for Høgskulen i Sogn og Fjordane.
Sogndal er landskjend for fotballaget sitt, som har vore eitt av topplaga i norsk fotball sidan det spela seg til cupfinalen i 1976.
I Kaupanger, på Slinde og på storgardane Stedje og Kvåle budde mektige adelsætter med store jordegods. Kaupanger stavkyrkje og store utgravingsfelt på Kvåle og Rutlin vitnar om fordums stordom. Det same gjer staselege herskapshus i Amla og i Kaupanger og på Vestreim, Kjørnes, Loftesnes og Stedje.
I Fjærland ligg Norsk Bremuseum og Den norske bokbyen, og turistbygda Fjærland har vorte vitja av både keisarar og rikfolk som drakk føremiddagstéen sin av gullkoppar. Du kan og lese om Kong Sverre og slaget ved Fimreite og om meistertjuven Gjest Baardsen.
Sogndal er mellom anna kjend som fruktbygda. Her blir det plukka eple i Hovehagen midt i sentrum på 1980-talet. Denne hagen måtte vike plass då Sogndal Kulturhus vart bygt i 1991. Foto: Leiv Bergum.
