Streiken er avblåst - normal skuledag frå tysdag

Det stadfestar både Utdanningsforbundet og KS i pressemeldingar måndag morgon.

Over 100.000 elevar ved meir enn 200 skular var råka av streiken til over 8.000 lærarar.

• LES OGSÅ: Lærarstreiken er over - har løyst stridspunktet

– Ein tøff, men naudsynt streik har ført fram. Vi har klart å halde fleksibiliteten lærarane trengde for å gjere ein god jobb for elevane, seier leiar Ragnhild Lied i Utdanningsforbundet.

Fastlåst situasjon

Trass gjentekne forsøk ved forhandlingsbordet, har forhandlingane vore fastlåst sidan før sommaren. Sidan skulestart har omfanget eskalert.

I Sogn og Fjordane er det berre skulane i Førde som har vore råka.

• LES OGSÅ: 3 millionar spart på streiken: - Håpar pengane går til noko godt
• LES OGSÅ: Slik støtta dei streikande lærarar

– I KS har vi følt veldig sterkt på ansvaret for at borna skal få komme på skulen. Det har vore hovudårasaka til at vi har gått endå ei runde for å forsøke å finne ei løysing på konflikta, sier styreleiar i KS, Gunn Marit Helgesen.

Ny uravrøysting

Det sentrale punktet i striden har vore lærarane si arbeidstid. Punktet i den nye arbeidstidsavtalen om at lærarane må godta meir bunden arbeidstid har vore kjernen i striden mellom arbeidsgjevarorganisasjonen KS og fagforeiningane.

No har partane funne ei løysing på dette. Løysinga gir lærarane ein stor siger i form av vetorett når det gjeld spørsmålet om meir bunden arbeidstid.

• LES OGSÅ: – Det er ikkje greitt at ein tiåring er åleine heime
• LES OGSÅ: Elevane strøymde til då han delte ut dei etterlengta skulebøkene

– Utdanningsforbundet skal så raskt som mogleg gjennomføre ei ny uravrøysting blant medlemmene i KS-området. Dersom avtalen blir godteken er streiken endeleg avslutta. I motsatt fall blir streiken teken opp att, seier Utdanningsforbundet i ei pressemelding.

Frå 1. august 2015

Avtalen som no blir anbefalt av både KS og lærarane sine organisasjonar; Utdanningsforbundet, Skolenes Landsforbund, Norsk Lektorlag og Musikernes Fellesorganisasjon, medfører at heile ansvaret for prosessar og avgjerder om organisering av arbeidstida blir lagt til den enkelte skule og kommune.

Avtalen trer i kraft frå 1. august 2015.

– Akkurat i dag er eg først og fremst glad for at streiken blir avslutta, og at born og unge i morgon endelig kan byrje skuleåret på alvor, sier Helgesen i KS.

• LES OGSÅ: Lærarstreiken går utover helsa til dei mest sårbare elevane, meiner rektoren