– Eg fryktar vel at det meste skal hamne i Kristiansand, og at vi ikkje får ha nokon ting att her i Aust-Agder, seier tillitsvald i NITO, Merete Varpe til NRK.
Fredag vart det klart at dei to fylkesembeta i Aust- og Vest-Agder skal slåast saman.
I første omgang skal det nye embete ha kontor både i Arendal og Kristiansand. I dag er det kring 100 tilsette ved fylkesmannen i Aust-Agder.
- Les også: Ønsker Djupedal som felles fylkesmann
Vil kjempe for arbeidsplassane
– Ein er veldig spent og det er ei viss bekymring for korleis det skal løysast praktisk. Det kjem til å gå veldig raskt. Det er berre eit drygt år til 1. januar 2016. Då skal ein ha samlokalisert avdelingane, seier tillitsvald i Naturviterne, Reidar Tveiten.
Ordførar i Arendal, Einar Halvorsen, er også uroa for arbeidsplassane i Aust-Agder, og at hovudkontoret hamnar i Kristiansand.
– Det var det første eg tenkte på då eg høyrde at dei to embeta skal slåast saman. Det kan eg seie, vi kjem til å kjempe for arbeidsplassane, seier han.
- Les også: Fryktar felles fylkesmann er eit steg på vegen mot eitt Agder
– Lyn frå klar himmel
Professor i statsvitskap ved Universitetet i Agder, Dag Ingvar Jacobsen, meiner at samanslåing av fylkesembeta er eit tydleg signal frå regjeringa.
Han meiner dette kan framskunde prosessen med kommunesamanslåing.
– Det kom som lyn frå klar himmel også for oss som har følgt prosessen ganske nøye. Dei viser at dei meiner alvor med samanslåinga. Dei går føre, seier Jacobsen.