Han opplevde fotballtragedien i Port Said 1. februar 2012 frå tribunen – ein tragedie han kallar ein massakre.

– Det var meir enn tribune-uro, det hadde klare politiske overtonar. Det var ein massakre, sa Bradley om det som skjedde framfor augo på han og spelarane i den egyptiske hamnebyen.

74 menneske mista livet i kampen mellom klubbane Al-Masry and Al Ahly i Port Said .

– Al Ahly er den største klubben i Egypt, og mange av spelarane der var landslagsspelarar. Vi jobba mykje i ettertid med det vi opplevde den dagen, og både eg og spelarane vart sterkare av det, fortalde Bradley på pressekonferansen.

– Det måtte vi. Vi måtte finne ein måte å vere eit lag på. Dei fire første månadene etterpå var tøffe. Men spelarane var utrulege, og deira respons på det dei hadde opplevd, var til stor inspirasjon for oss andre rundt laget, seier han.

Tragedien førte til at den egyptiske ligaen var suspender for resten av sesongen. Bradley stod dermed med eit landslag utan løpande aktivitet i sin heimlege liga.

– Utruleg positive år i Egypt

Hans oppgåve var å få Egypt til VM i Brasil. Det heldt nesten, men i omspelet tapte dei for Ghana.

– Det var irriterande å vere så nær og ikkje klare det, etter måten vi takla uroa på, seier Bob Bradley.

– Mine to år i Egypt var utrulege positive. Vi visste at Egypt var inne i ein historisk periode då vi reiste dit, og vi visste at det ville by på heilt spesielle utfordringar. fortalde Bradley.

Han kom til landet rett etter revolusjonen og uroa på Tahrir-plassen i Kairo. Like fullt fekk han ro til å jobbe med laget fram til tragedian i Port Said.

– Ingen av oss kunne føresjå det.

Frå Egypt til Stabæk

No er Bob Bradley ny trenar for eliteserieklubben Stabæk. Det stadfesta Stabæk sjølv i dag. Han har signert ein toårsavtale.

Stabæk har vore i samtaler med Stabæk sidan november , og avtalen vart klar i går.

– Men vi er ikkje villmenn ved å signere denne avtalen. Vi er innanfor budsjettet vårt, sa Stabæk-leiar Espen Moe.

Bradley (55) var landslagssjef for USA frå 2006 til 2010, då han leia dei i VM i Sør-Afrika. Etter det hadde han tilsvarande jobb for Egypt i VM-kvaliken til Brasil-VM. Der kom Egypt til den avgjerande playoffen, men tapte for Ghana. Egypt vann likevel 67 prosent av kampane dei spela under Bradley.

– Dette betyr enormt mykje. Det er så stort for Stabæk at vi nesten ikkje kan førestille oss det. Hans jobb som landslagstrenar er heilt enorm. Det han fortel om jobben i Egypt, er heilt enormt, seier Stabæks sportsdirektør Inge Andre Olsen til NRK.

– Vi har satsa høgt og lykkast. No er det mykje kjensler og stor glede.

Skal bruke Bradleys nettverk

– Kva betyr dette for å få nye spelarar?

– Det betyr mykje. Vi har satsa på eigenutvikling, og har eit ungt lag. Men vi må likevel hente fleire spelarar. No skal Bobs nettverk dragast inn for å forsterke laget, seier Olsen.

– Bob er amerikanar, han tenkjer stort. Han har gjort god research før han sa ja til jobben. Han har sett potensialet som ligg her. No skal han byggje eit sterkt lag, seier Inge Andre Olsen.

Kjende til Stabæk frå før

Stabæk rykka opp frå 1. divisjon til eliteserien i haust. Då var Petter Belsvik trenar, men han slutta etter sesongen.

– Eg visste litt om Stabæk frå før. Då eg leia USA, hadde vi spelarar frå Noreg. Dei følgde eg opp, og lærte derfor litt om norsk fotball, sa Bradley på pressekonferansen.

Han hadde lagt merke til Stabæks "hårete mål" frå nokre år tilbake, og lika det.

– Vi veit at storleiken på klubben ikkje treng vere det viktigaste. det viktige er at arbeidet er gjort på rett måte. Det finst nok av døme på store klubbar som gjer det meste feil, sa han.

Dei sterkaste står att

Han nemnde spesielt det som skjedde etter at Stabæk vart seriemeister i 2008.

– Deretter møtte klubben ulike hinder. Då vart mange folk i og rundt klubben borte. Men dei som vart att, reiste seg sterkare enn før. Det er nokon av dei eg har møtt her no, sa Bradley.

– Stabæk har alltid hatt idear om korleis fotball skal spelast. Eg trur på lag som vil underhalde og som likar å spele fotball. Og eg trur på spelarar som veit dei representerer noko som er større enn dei sjølve når dei spelar, sa Bradley.

– Det er denne mentaliteten eg likar, og som eg vil prøve å dyrke. Eg vil oppmuntre spelarane til å spele på ein måte dei likar og kan nyte, la han til.

Ser fram til å bli klubbtrenar igjen

Han ser fram til å kome tilbake til ein jobb som klubbtrenar etter mange år som landslagstrenar.

– I ein klubb har du spelargruppa til stades heile tida, og du møter dei på treningsfeltet kvar einaste dag. Du har mange kampar som kjem tett. Det er noko heilt anna enn eit landslag, og no ser eg fram til å trene ein klubb igjen, seier Bradley.

Bradley er far til Michael Bradley, som har 80 landskampar for USA, og som no spelar i Roma i Italia.