– Skulle vi gå tomme for mat er det jo alltids fisk i havet, flirer Hugo Salamonsen.
Han er ein av om lag 70 innbyggjarar i Kamøyvær. Det er eitt av fleire fiskevêr i Nordkapp som er isolert frå kommunesenteret Honningsvåg – som igjen er isolert frå resten av verda.
– Eg trur dette må vere den billegaste påska eg har opplevd sidan eg budde heime på guterommet. Eg har jo ikkje fått handla noko som helst, seier Salamonsen.
Han er også bygdelagsleiar i Kamøyvær. Bygda får forsyningar sjøvegen om dei treng det. Salamonsen innrømmer at det hadde vore kjekt å fylle på kjøleskapet med nokre søtsaker i høgtida. Men det får vente. Salamonsen håper vegen blir opna til veka.
– Vi er vande med å stå han av her oppe. Men klart. Vi var først vêrfaste i fire dagar. Så var vegane opne nokre dagar igjen. Og no har vi vore vêrfaste i ytterlegare éi veke. Påska er nok øydelagt for mange her på Finnmarkskysten, seier Hugo Salamonsen.
Vêrfaste på ferie
Familien Figenschou er blant dei som har fått merke isolasjonen. Dei starta påskeferien heime i Tromsø – og måtte ta ei rekkje omvegar før dei kom seg til Honningsvåg, der pappa Jarl opphavleg kjem frå. Der er dei no isolerte.
– Det ser ut som vi blir sitjande her nokre dagar til. Vi håper å få reise tilbake til Tromsø med Hurtigruten tysdag, seier Jarl Figenschou.
– Det handlar ikkje om korleis ein har det, men korleis ein tar det, supplerer mamma Therese.
Og ifølgje niesa Adele på 12 år tar dei det bra.
– Det er dumt å vere vêrfast, men fint å vere vêrfast akkurat her, smiler ho.
Mot snørekord
Kor lenge turistar og fastbuande i Nordkapp blir isolerte veit ingen per no. Det snør framleis mykje, noko som gjer skredfaren stor.
I Honningsvåg har den pensjonerte rektoren Sigfred Andersen målt snø i rundt 25 år. Han fortel at årets snømengder kjem til å overgå rekordåret 1997.
– Då kom det 180 centimeter. No ligg vi på 175. Eg trur vi kan passere to meter i år, fortel Andersen.
Som er ein av mange isolerte som tek situasjonen med godt humør.
– Eg får seie som engelskmennene: «Fog on the channel. Continent isolated.» Det er altså dei andre som er isolerte frå oss – og ikkje omvendt, seier Andersen med eit glimt i auget.
Så lenge dei eldre og trengande får hjelpa dei treng, noko dei ser ut til å gjere enn så lenge, vil han ikkje krisemaksimere situasjonen.