Kantinesjefen skjulte lunsjen for byråkratane – kutta matsvinnet kraftig på kort tid

I desember i fjor vedtok politikarane i Hordaland å kutte i matsvinn og matkasting i fylkeskommunale verksemder.

Fylkesrådmannen svarte med å inngå samarbeid med selskapet Beredt, som driv kantinene i svømmeanlegget Ado Arena, på tre vidaregåande skular og i fylkeshuset.

I slutten av februar fjerna Beredt ein del av maten som tidlegare hadde stått ferdiglaga i disken, og hengde opp plakatar ved avfallsstasjonane for å bevisstgjere kantinebrukarane.

Dei enkle tiltaka skulle vise seg å ha ein formidabel effekt: Frå ei veke til den neste, då satsinga blei innført, gjekk matavfallet ned frå 47 til 33 kilo – ein reduksjon på 33 prosent.

– Det er eigentleg litt skremmande at det gjekk an å redusere så mykje, berre ved å gjere gjestane merksame på at «du får alt du vil ha, men ikkje ta meir enn du treng», seier Morten Hoff i Beredt.

Fjerna «hyllevarmarane»

Byråkratane på fylkeshuset, der NRK er på besøk i kantina, må no i større grad enn før bestille lunsjen dei har lyst på.

– Då får dei og den maten dei treng, i staden for at ferdigmaten må stå i disken som «hyllevarmarar», og til slutt går i bosset, seier Hoff.

Kantinepersonalet oppmodar også dei tilsette om å bestille mindre møtemat, og om heller å forsyne seg to gonger i kantina enn å ta for mykje første gongen.

Hoff i Beredt understrekar at gjestane ikkje risikerer å måtte gå svoltne opp att på kontoret.

– Sjølv om disken kan sjå tom ut, betyr det ikkje at ein ikkje kan få mat. Via oppslag i kantina og på intranettsidene blir gjestane gjort merksame på at beteninga kan lage det dei ønskjer på eit par minutt, påpeiker han.

• Les også: Kampen mot matsvinn verkar: Hotell og restaurantar kastar stadig mindre mat

– Mange kan ha mykje å gå på

Mette Nygård Havre, som nyleg vann Hordaland fylkeskommune sin miljøpris for sin kamp mot matsvinn, synest resultata er svært oppløftande.

– Dette viser jo at veldig mange kan ha veldig mykje å gå på, og at det absolutt ikkje treng å vere så mykje som skal til. Alle organisasjonar og bedrifter i Noreg burde sjå på korleis dei kan redusere sitt matsvinnet sitt, meiner Havre.

Også politikarane er overvelda over den raske og kraftige effekten av vedtaket dei fatta før jul. Fylkesvaraordførar Pål Kårbø (KrF) håpar andre no vel å kopiere dei.

– Eg vil oppmode alle organisasjonar, og familiar heime, til å vere medvitne eige forbruk, og ikkje minst avfall. Klarar vi å spare litt, alle saman, så blir det eit bidrag til vårt felles klima og miljø, seier Kårbø.

• Les også: Kommunen tar ikke imot, så Simon har sin egen kompost