Bystyrerepresentant Daniella Baarholm (Frp) i Ålesund har delt fleire pro-russiske innlegg på Facebook, skriv Nettavisen.
Baarholm sit også i styret til LO i Ålesund og Omegn.
Nyleg delte ho mellom anna ein video som skal vise kor mykje betre russisk-okkuperte Mariupol har blitt etter at Russland har begynt å bygge opp igjen byen dei har bomba og okkupert.
Baarholm seier til Nettavisen at ho har delt innlegga for å starte ein debatt, ikkje fordi ho nødvendigvis er enig. I ettertid er innlegga sletta.
Gruppeleiar Harald Tom Nesvik seier til avisa at Ålesund Frp er klokkeklar på at Russland har angripe Ukraina i ein angrepskrig som er fullstendig uakseptabel.
To tilsette i heimetenesten på Nordmøre skal ha snoka i journalen til ein pasient. Det går fram av tilsynsrapporten frå Statsforvaltaren i Møre og Romsdal.
Snokinga skal ha skjedd over fleire dagar etter at pasienten blei lagt inn på sjukeheim, og dei tilsette har forklart snokinga med at det var eit uttrykk for omsorg.
Begge har i ettertid beklaga det som skjedde.
Fylkeslegen i Møre og Romsdal skriv at pasientar skal kunne oppsøke helse- og omsorgstenesten utan å trenge å frykte at uvedkomande får tilgang til opplysninger om dei.
Snokinga blei oppdaga då kommunen tok stikkprøver.
Politiet opprettar sak etter at ein bilist køyrde ned ein lyktestople i Elnesvågen i Hustadvika.
Føraren kom uskadd frå hendinga.
Ein lege i Molde får kritikk for å ha brukt tvang overfor ein pasient. Ved hjelp av politiet blei pasienten henta heime og lagt inn og undersøkt på ein sjukeheim. Statsforvaltaren i Møre og Romsdal konkluderer med at dette er i strid med lova.
Det blei heller ikkje dokumentert godt nok i journalen til pasienten kva for vurderingar legen tok.
Molde kommune får samtidig kritikk for å ikkje sørga for god nok opplæring, mellom anna av tilsette sitt høve til å bruke tvang overfor pasientar.
Den som mener seg rammet av urettmessig publisering, oppfordres til å ta kontakt med redaksjonen. Pressens Faglige Utvalg (PFU) er et klageorgan oppnevnt av Norsk Presseforbund som behandler klager mot mediene i presseetiske spørsmål.