– Álggos jurdilin ahte vuogga lei darvánan suinniide. Muhto go de oidnen ahte lei hávga, de šadden «gira», muitala Iver Máhtte Buljo (11).
Son lea hárjánan oaggut ja iige jierásmuvvan vaikko čázis iđii stuorábuš guolli. Vuossárgga son beasai vuohččan dán giđa bivdit Guovdageainnu eanu alde fatnasiin. Ja albmás lei lihkku.
– Mun bargen nu mo láven; váibadit ja de roahkastit, čilge son.
Hávga dettii guhtta kilo, ja lei measta seamma guhkki go ieš. Iver Máhtte lea oggon dan rájes go lei viđa jahkásaš. Stuorámus hávgga maid lea goddán, dettii čieža ja bealle kilo.
– Lea gelddolaš bivdit hávggaid. Dat láhttejit dego krokodillát de. In mun bala gal, go eai han dat rohkkát olbmo, muitala Iver Máhtte.
Dál beassá son borrat hávgagáhkuid maid eatni ráhkada.
– Dat gal leat hui njálgá, dadjalastá.
Eatni: – Oahppan ieš birget
Eatni Inger Eline Eira Buljo ii eahpit gal luoitit gánddas eanu ala.
– Son lea oahppan mo galgá láhttet fatnasis ja johkagáttis. Mun gal roahkka duosttan su luoitit okto dohko. Ja go olmmoš addá luohttámuša ja ovddasvástádusa mánnái, de oahppá ieš birget. Sus lea maid dieđusge govdunliiva badjelis, muitala Inger Eline.
Go Inger Eline fuomášii bártnis guollelihku, de vulggii songe mielde. Ovdalaš lei Iver Máhtte goddán guokte guoli.
– Muhto go mun ledjen fatnasis, de jávke hávggat. Ammal mun balden daid, dadjá son.
Inger Eline lea maid álo govvidan Iver Máhte maŋŋágo lea goddán guliid. Dál leat badjel 70 gova Instagramas.
BIVDOHISTORJÁ: Iver Máhte eatni lea ráhkadan Instagrammii ráiddu gos čájeha makkár gulliid son lea goddán.
