Nordlándda fylkkasuohkan ja Sámediggi fidnejedje dieđu miessemánu 14. beaivve, ahte muhtin lea roggan sullii 80 rokki Kalleholmena ráfáidahtton kulturmuitobáikái.
Vihtan muitala, ahte son lei oaidnán dáhpáhusbáikki guovllus olbmo metállaohcanrusttegiin sullii vahku ovdal rokkiid gávdnoma. Kulturmuitobáikkis leat eanačomat ja máŋga sámi kulturmuittu.
Báiki lea ráfáidahtton kulturmuitolága mielde. Bolesat leat suoidnemánus sádden Sámediggái reivve mas duođaštit, ahte sii leat dál dutkamin ášši.
Kulturmuitobázahusaid ohcamin
Sámediggeráđi ráđđelahttu Berit Marie P.E. Eira muitala, ahte báikkis gávdnojit boares ássansajit, gos sámit leat dolin orron. Son máinnaša maiddái, ahte kulturmuitobáikkis sáhttá gávdnot feara mii.
Eira eahpida, ahte vearrodahkki sáhtii lean ohcamin kulturmuitobázahusaid, maid soittii diehtit doppe leat.
– Ballun lea dieđusge dat, ahte muhtun lea ohcamin daid kulturmuittuid, mat doppe leat.
Eira goit namuha maiddái dan, ahte olmmoš sáhttá muhtin earáge siva dihte leat roggan rokkiid.
Stuorra vahát
Berit Marie P.E. Eira oaidná dán dáhpáhusa stuorra vahágin danin, go kulturmuitobáiki lea mávssolaš buot sámiide.
– Dat gal lea dieđusge hirbmat vahát, go doppe leat sámi kulturmuittut ja jus dat leat vel vahágahtton, billistuvvon dahje dolvojuvvon. Dathan leat divrasat buot sápmelaččaide dat sámi kulturmuittut, maid min máttut leat ásahan dohko.
Ášši gieđahallan vel gaskan
Vearrodahkkis ii leat vuos diehtu ja bolesat leat ain dutkamin ášši. Sámediggi ávžžuhage dahkat dieđiheami eiseválddiide, jus oktage leš vuohttán guovllus juoidá vávjjehahtti ovdal miessemánu 9. beaivve.