Hopp til innhold

ESC - Eamiálbmogiid boahttevaš lávdi?

Eurovision Song Contest geasuha, ja artistat miehtá Eurohpa oidnet dán lávddi dehálažžan.

Jessica Mauboy geahččalemiin dán jagáš ESC-gilvvus.
Foto: Wenche Marie Hætta / NRK

Mátkereive Lisboas

Mun lean Lisboas. Dáppe leat dál artisttat, berošteaddjit ja vaikko man ollu journalisttat čoahkkanan. Eurovision Song Contest lea dat mii čohkke.

Journalistat leat barggus olles áiggi Altice arenas. Soapmásiid oaidná hui álkit guđe riikii sii gul

Journalistat leat barggus olles áiggi Altice arenas. Soapmásiid oaidná hui álkit guđe riikii sii gullet, nu go dát Skottlándda journalista.

Foto: Wenche Marie Hætta / NRK

Maiddái mun sámi journalistan lean dán háve dáppe čuovvume máilmmi stuorámus musihkkagilvvu. Ja sivvan go deike lean vuolgán lea go dát lea šaddagoahtán lávdin masa maiddái eamiálbmotartisttat besset. Vaikko vel gullet ge unnitálbmogii, de eai ovddas gal iežaset álbmoga, muhto baicca ruovtturiikkaset. Eai fal nu dávjá gal, muhto sii leat goit leamaš doppe. Mathis Hætta, Simona Máhtte, lei dat vuosttaš gii dan dagai. Áidna artista dássážii gii gávttiin bođii dán lávdái, ja juoiggai dan lávlagis man ollugat muitet vel dál ge.

Unnitálbmogat oidnosii

Dál de lea fas eamiálbmot ovddasteaddji beassan lávdái, muhto son boahtá nuppe bealde máilmmi - guhkkin eret Eurohpa. Su namma lea Jessica Mauboy.

Policia lea juohke sajis

Portugisalaš lágideaddjit váldet sihkarvuođa duođas. Politiiját leat juohke sajis, bearráigeahččame gilvobáikki.

Foto: Wenche Marie Hætta / NRK

Ii leat álki oažžut Jessica ságaide, go son lea nu bivnnut ahte eai luoitte journalisttaid su lahka. Dát sámi sáhkkes journalista livččii háliidan diehtit maid son ieš jurddaša dál, ahte son aborigiinna artistan sáhttá leat ovdagovvan nu máŋgasii. Muhto gažaldat lea ain jearatkeahttá. Dat dušše jorrá mu oaivvis, ja nu go mun oainnán, de šattašii dát vuoitun maiddái sápmelaččaide jus Jessica vuoittášii. Ahte son gállá bálgáid maid eará unnitálbmogiid artisttat soitet dustet čuovvut.

Luođi gal dovdet

Preassaguovddážis leat journalisttat gealdagasas, ja gehččet maid bookingfitnodagat einnostit. Muhto oddsat leat dego dálki - dat rievddadit. Mun humadan goit iežan bargoustibiiguin, ja muitalan gosa gulan.

ESC 2018 preassalanjas

Preassaguovddážis ii váillo olmmoš - ii ge čáhci...

Foto: Wenche Marie Hætta / NRK

Vaikko ollu journalistat dovdet ESC-gilvvuid historjjá, de eai leat gallis geat dihtet mii sápmelaš lea. Go mun de juoiggastan veaháš Sámiid eadnan-šuoŋa, de gal nivkkuhit ja dadjet ahte diet šuokŋa gal lea oahpis. De báhcá ge munnje jurdda ahte sáhttá addit doaivaga ahte eamiálbmotmusihkka nai beassá eanet gerddiid gullot Eurovisionis, ja darvánit olbmuid bealljái ja muitui. Go giella ii oro dahkame maide. Muhtun riikkaid lávlagat leat ruovtturiikka gillii, eai ge eŋgelasgillii man eatnasat ipmirdit. Sámegiella soaittášii šaddat vaikko man bivnnuhin dán lávddis.

Norgga journalisttat preasseguovddážis

Norgga mediabargit maid leat valljit Lisboas, ja leavga gal ferte oidnosis.

Foto: Wenche Marie Hætta / NRK

Ii leat guhká vel ovdal go mii diehtit dán jagáš bohtosa, maŋŋel go Jessica ja dat eará artistat leat lávlon ja jienasteapmi lea loahpahuvvon. De mii diehtit lei go eamiálbmotjietna mii vuittii vai ii, ja beassat geahččat lei go dás ávki su álbmogii. Muhto mii jienastit váimmu mielde, ja eai buohkat gesso seamma šukŋii. Mii fertet beare vuordit...

Wenche Marie Hætta, Lisboas

Korte nyheter

  • Beitekrise i Karasjok - skuterløyper stengt

    Kriseberedskapsutvalget har erklært beitekrise i store deler av Karasjok. På grunn av dette er flere skuterløyper stengt, skriver Karasjok kommune på sin nettside.

    Løype 5 mellom Láŧevuovdi og Guovžilbohki og løype 17 Badjenjárga til Dákteroavvi stenges midlertidig.

    Løypa stenges fram til 8. april av hensyn til reindriften.

    Karasjok kommune kan stenge skuterløyper etter kommunal forskrift om snøskuterløyper § 7.

    Beitekrisen har rammet flere distrikt i Nordland, Troms og Finnmark, og har så langt berørt i overkant av 60.000 rein.
    Foto: Landbruks- og matdepartementet
  • Dieđihit eambbogo 30 goddon Israelea falleheamis Syriijas

    Siviila olbmot ja soalddáhat galget leat goddon israelalaš áibmofalleheamis Syriijas, syriijalaš eiseválddiid dieđuid mielde.

    Eanetgo 30 olbmo galget dieđuid mielde goddon.

    Dieđuid mielde galgá Israel fallehan Aleppo gávpoga mannan ija diibmu 01.45 báikkálaš áigge.

  • – Alimus Hálddahusriekti bággeha ii-sápmelaččaid Sámediggái 

    Sámiráđi ságadoalli Áslat Holmberg oaivvilda, ahte Suoma Alimus Hálddahusriekti (AHR) badjelgeahččá sámi álbmoga.

    – AHR lea ođasmahttán mearrádusaid, mat leat gávnnahuvvon rihkkut sápmelaččaid vuoigatvuođa friddja politihkalaš ortniiduvvamii, oaivvilda Holmberg.

    AHR lea mearridan, ahte mannan čavčča sámediggeválggaid galgá lágidit ođđasit.

    Riekti lea gieđahallan badjel čuođi sámediggeválggaid válgalogahallama ja válgabohtosa guoski váidaga.

    – AHR fas bágge Sámedikki dohkkehit 72 ii-sápmelačča ižas jienastuslohkui. Ná áitá Sámedikki legitimitehta sápmelaččaid ovddastanorgánan, cuiggoda Holmberg.

    Aslak Holmberg
    Foto: Piera Heaika Muotka / Sámiráđđi