– Det er hårreisande at statsadvokaten seier at den trakasserande meldinga Liv Signe Navarsete fekk, ikkje har noko hjå politiet å gjera, seier Andrea Voll Voldum til NRK.
I går sa statsadvokaten i Oslo, Jørn Sigurd Maurud, at politiet har meir alvorlege saker dei bør bruke ressursar på. Og at dei ikkje bør prioritera behandling av den grove meldinga Navarsete fekk tilsendt i 2016.
Voldum vart kjend over natta i 2016, etter ei rettssak om det politiet meinte var ei gruppevaldtekt på Hemsedal. Tre menn vart frikjende i rettssaka.
Skuffa
Sidan ho stod fram med si historie i 2016 har Voldum starta stiftinga «Vi tror deg», som jobbar mot seksuelle overgrep og trakassering.
– Det er spesielt at statsadvokaten uttalar seg før saka har hamna hos politiet. Då sender han ut eit signal om at det er heilt greitt å sende slike meldingar til kvinner. Det er ikkje bra, seier Voldum.
– Han peikar jo på at politiet har grovare saker å prioritere, har han ikkje eit poeng med det?
– Dette er seksuell trakassering på høgt nivå, og viss vi ikkje skal bruka tid på sånne ting vert det lettare og lettare å gjera større handlingar med seksuell bakgrunn mot folk. Eg synest at politiet skal ta denne saka seriøst og støtta opp om Liv Signe Navarsete.
Det var under ein hyttetur i 2016 i Åre i Sverige at den grove meldinga vart sendt til Navarsete. På hytteturen var det totalt ti personar og åtte av dei hadde verv i Senterpartiet.
Så langt har ingen av dei som var på hytteturen tatt på seg skulda for å ha sendt meldinga. Torsdag morgon vart saka meldt til politiet i Lærdal, etter at deltakarane på hytteturen hadde fått frist til midnatt med å seie kven som stod bak meldinga.
I går kveld sa Navarsete på «Torp» at ho er sjukmeld på grunn av presset etter at saka om meldinga vart kjend i media for knappe to veker sidan.
Bør ikkje prioriterast
Statsadvokaten i Oslo sa i går at han meinte at politiet har meir alvorlege saker å handtera enn ei grov melding på Facebook. Han seier dette om kritikken frå Voldum:
– Eg trur eg tar sjansen på å unnlata ein dialog med denne stiftinga. Forhåpentlegvis vil dei fleste forstå at min kommentar dreier seg om noko anna enn om det er «greitt» å senda slike meldingar eller ikkje, seier Maurud til NRK onsdag kveld.