Det var eit bittert møte. Dei to leiarane stira på kvarandre og snakka med låg røyst. Opposisjonsleiar Nikol Pashinyan gjorde det klart at han ikkje var komen for å forhandle. Ekspresident og statsminister Serh Sarkisian må gå av, elles vil demonstrasjonane halde fram.
Like etter vart opposisjonsleiaren arrestert av sivilkledd politi. Dette til trass for at han har immunitet som medlem av nasjonalforsamlinga.
Fryktar for ein «armensk Putin»
Demonstrantane skuldar Sarkisian for å lyge til folket. Han hadde alt sote dei maksimale to periodar som president, og kunne ikkje søke attval.
Tilbake i 2015 endra han grunnlova slik at makta vart overført frå presidenten til statsministeren.
Kritikarane hevda at han førebudde seg på å bli statsminister, slik som Vladimir Putin hadde gjort, og slik tvihalde på makta.
Sarkisian forsikra folket om at han ikkje hadde ambisjonar om å bli statsminister.
Men i mars kom det signal om at Sarkisian ville bli statsminister likevel, og det var da folk byrja å demonstrere.
Og da han formelt vart utnemnd til statsminister i april, eksploderte raseriet.
Sjå demonstrasjonen i Jerevan direkte
Armensk journalist: – Farleg i Armenia no
NRK har vore i kontakt med ein journalist i Armenia, som seier folk er redde. Fleire journalistar har blitt angripne av sivilkledd politi, og han vil difor ikkje stå fram med namn.
Men NRK får vite at politiet no er i full gang med å arrestere leiarane for demonstrasjonen, i håp om å få situasjonen under kontroll.
Det er uvisst kor mange som har blitt arrestert i helga, men truleg over 300 menneske. Videoar på sosiale medium viser eldre kvinner som hamnar i klammeri med politiet.
I går var det den største demonstrasjonen sidan protestane byrja i mars.
