Hertuginne Kate og prins William fekk sitt tredje barn måndag formiddag. Prinsen blei fødd på den private fødeklinikken Lindo Wing på St. Mary's Hospital i London klokka 11.01 britisk tid (12.01 norsk tid).
Frå før har paret sonen prins George (4) og dottera prinsesse Charlotte (2).
- Les også:
Dei forlèt sjukehuset rundt klokka 19.00 norsk tid, sju timar etter fødselen. På spørsmål om kva namn prinsen skal få, svarte hertuginna slik:
– Det får de snart vite.
– Arthur favoritt
Veddemålsagentane har nok å gjere. Alex Apati er PR-agent i Ladbrokes.
– Arthur har vore favoritt lenge, seier Apati til NRK.
– Men om du ikkje vil setje pengane dine på Arthur, er James, Albert og Philip gode alternativ, legg han til.
Tradisjonsrikt namn
Arthur er eit namn med lange tradisjonar i Storbritannia. Kong Arthur er ein legendarisk, mytisk konge som skal ha levd på 500-talet.
Arthur er eitt av prins Charles sine mellomnamn (Charles Philip Arthur George). Også prins William har Arthur i namnet sitt (William Arthur Philip Louis).
Tidlegare statsminister i Storbritannia, David Cameron, har ein son som heiter Arthur.
Mange britar held også ein knapp på Philip. Prins Philip har hatt mykje å seie for prinsane William og Harry i oppveksten. Mellom anna var det han som overtalte dei to prinsane til å gå saman med prins Charles i gravferda til prinsesse Diana.
Opptatt av tradisjonar
Kate og William har tidlegare vist at dei er opptatt av namnetradisjonar.
Sonen George heiter eigentleg George Alexander Louis. Han er kalla opp etter dronning Elisabeth sin far, George VI. Når George ein gong blir konge, skal han kallast George VII.
Louis-namnet er frå Louis Francis Albert Victor Nicholas Mountbatten, som var prins Philips onkel. Han døydde i eit IRA-attentat.
Dottera Charlotte er – med namnet Charlotte Elizabeth Diana – kalla opp etter bestemor og oldemor. Charlotte er mellomnamnet til hertuginne Kate si søster, Philippa Charlotte «Pippa» Middleton.
No ventar det britiske folket i spenning på kva prinsenamnet blir.