Den amerikanske marinen opplyste torsdag at to store transporthelikopter er sende til øya frå basen ved Honolulu. Kvart helikopter kan ta 50 passasjerar.
Kilauea-vulkanen ligg på øya Hawaii, som er den største øya i delstaten. Etter at vulkanutbrota starta 3. mai, er rundt 2000 menneske evakuerte.
Kan bli isolerte
Styresmaktene seier at det kan bli nødvendig å evakuere 1000 menneske til.
Det er stor fare for at lava frå vulkanen skal sperre hovudvegane til dei mest avsidesliggjande delane av øya, og dersom innbyggjarane ikkje blir evakuerte før det eventuelt skjer, vil dei bli heilt isolerte. Dei vil ikkje kunne nå verken butikkar, skular eller sjukehus.
- Les også:
Sidan utbrota starta, har det komme ut lava frå meir enn 20 sprekkar som har opna seg i bakken. 50 bygningar er øydelagde – rundt halvparten av dei er bustadhus.
Ein person er skadd etter at han blei treft av ein flygande lavabit.
Farlege gassar
Det lek også ut farlege gassar frå sprekkane i bakken. Folk er bedne om å halde seg unna.
Sist helg nådde lavaen havet. Reaksjonen mellom vatn og lava dannar det som på engelsk blir kalla «laze». Dampen kan føre til lungeskadar og irritasjon på hud og auge, ifølgje sivilforsvaret på Hawaii.
Kilauea er ein av dei mest aktive vulkanane i verda. Vulkanen har sendt oske og stein fleire tusen meter opp i lufta.