– Vi nyttar eit språk Trump forstår – mobbing

Initiativtakarane til Donald Trump-ballongen, som no svevar lufta like ved parlamentet i London, seier dei bevisst brukar eit språk dei veit Trump forstår, nemleg mobbing.

Det er venta at titusenvis av menneske vil delta i demonstrasjonen mot den amerikanske presidenten i London og andre britiske byar i dag. Trump likar dårleg den varsla demonstrasjonen, og at dei har fått løyve til å hengje opp den gigantiske ballongen ved parlamentet i bydelen Westminster.

Ballongen framstiller Trump som ein skrikande baby med bleie. NRK møtte i føremiddag ein av initiativtakarane til ballongstuntet, Matt Bonner.

– Eit språk Trump forstår

– Vi bestemte oss for å lage ein oppblåsbar baby-Trump fordi vi syntest det var ein god måte å demonstrere på. Vi nyttar eit språk som Trump forstår, nemleg mobbing. Han har mobba folk i mange år. Han har eit stort ego, og det er på denne måten vi prøver å nå inn til han, seier Bonner.

Han meiner at Trump, til liks med ballongen, ikkje er spesielt tjukkhuda.

– Mange i Storbritannia føler at Donald Trump har sine støttespelarar i vår eigen konservative regjering. Men folk er forbanna på mobbinga hans, på rasismen og klimapolitikken og hans syn på migrantar. Lista er endelaus, legg Matt Bonner til.

Kvass kritikk

Det er borgarmeister Sadiq Khan som har godkjent heisinga av ballongen, og Trump kjem i eit intervju med avisa The Sun med kvass kritikk av han. Han skuldar Khan for å ha gjort ein dårleg jobb, og han viser blant anna til mykje kriminalitet og terror i London.

Sadiq Khan reagerer sterkt på at Trump nærmast gir han skulda for terrorangrepa i byen.

Den amerikanske presidenten kjem også med beisk kritikk av statsminister Theresa May i intervjuet, men han passar også på å seie at han likar henne godt. I Intervjuet rosar han Boris Johnson, som trekte seg som utanriksminister tidlegare denne veka i protest mot brexit-politikken til May

Dei som organiserer protestane mot Trump opplyser at det er planlagt demonstrasjonar i 50 byar i Storbritannia i dag og i morgon.

Erna Solberg: – Ikke noe nytt i det Nato-landene har blitt enige om

Dette er de fem ømmeste punktene mellom May og Trump

Skottland før toppmøte

Trump sjølv har ikkje tenkt å opphalde seg i London så lenge. Han overnatta i den amerikanske ambassadørbustaden i Regent's Park, og området har vore totalt avstengt av politiet av frykt for uro.

I dag skal han først vitje ein militærbase, før han skal ha eit bilateralt møte med Theresa May. Etter dette møtet blir det truleg ein pressekonferansen. I ettermiddag skal Trump til te med dronning Elizabeth i Windsor Castle.

Etter det offisielle programmet i dag reiser presidenten til den golfklubben han eig i Skottland, der han skal opphalde seg i helga. Deretter går ferda til den finske hovudstaden Helsingfors, der det blir toppmøte mellom Trump og hans russiske kollega Vladimir Putin.