Det var måndag kveld norsk tid, like etter den mykje omtalte pressekonferansen med Donald Trump og Vladimir Putin i Helsingfors, at meldinga om arrestasjonen av Maria Butina vart gjort kjent.
Det kvite hus har gjort det klart at dei følgjer saka nøye.
Den 29 år gamle kvinna, fødd og oppvaksen i dei sibirske skogane, som ho sjølv har sagt det, var student ved American University i Washington DC til mai i år. I løpet av studietida i den amerikanske hovudstaden har ho vore i nær kontakt med fleire mektige politikarar frå Det republikanske partiet, og ho har vore spesielt aktiv i våpenorganisasjonen National Rifle Association (NRA).
Det er uklart når saka mot henne kjem opp.
– Direkte line til Putin
Den amerikanske påtalemakta meiner ho har tilbode sex for å innynde seg hos mektige menn i Washington. Ho skal ha sagt til medstudentar i Washington at ho nærmast hadde ei direkte line til Russlands president Vladimir Putin.
I ein offisiell kommentar frå russisk UD heiter det at arrestasjonen av Maria Butina berre er ein måte å undergrave dei positive resultata frå toppmøtet mellom Putin og Trump i Helsingfors.
Det synest å vere klart at Maria Butina i Russland har jobba tett opp mot Alexander Torsjin, ein støttespelar for Vladimir Putin og nestkommanderande for den russiske sentralbanken. FBI meiner også at ho har vore i kontakt med fleire russiske etterretningsoffiserar, blant anna frå FSB, etterfølgjaren til KGB.
Det amerikanske føderale politiet meiner at Butina har vore ein «ulovleg agent i ein russisk aksjon for å skaffe seg innverknad på amerikansk politikk».
Romantisk forhold med politikar
Dokument som vart presenterte i retten, viser at 29-åringen saman med Torsjin, starta planlegginga alt i 2011. Då møtte Torsjin presidenten i National Rifle Association, samstundes som Butina tok initiativet til å starte opp ein liknande organisasjon i Russland, «Retten til å bere våpen».
I 2013 vart ho kjent med ein kjent republikansk politikar og dei innleidde eit romantisk forhold. Gjennom denne politikaren skal ho ha fått tilgang til fleire maktpersonar i Washington, og ho greidde å få livsvarig medlemskap i National Rifle Association.
I juli 2015 vart ho valt av NRA til å stille spørsmål til Donald Trump under ein kongress i Las Vegas. Ho spurde han blant anna om kva planar han hadde for forholdet med Russland.
– Tilbod om sex
I dokumenta som blei lagde fram for domstolen onsdag går det fram at Butina prøvde å få jobb i ei viktig lobbygruppe i Washington, og at ho tilbaud sex for å nå målet sitt.
I ei direktemelding på Twitter skal Alexander Torsjin ha skrive til henne at «Dette er kampen for framtida og vi kan ikkje tape. For då vil alle tape».
I tiltalen heiter det blant anna at Butinas og Torsjins mål var på ein nedrig måte infiltrere det amerikanske maktapparatet for å fremje russiske interesser.