PÅ NORSK:
(Muitaleaddji: John E. Utsi)
Dás lahkosis, dán Apokjávrris Johkamohki oarjelis, gulle olbmot dávjá imaš jienaid. Dalle go leai dálki, arvi ja biegga lávejedje issoras fasttes jienat skádjat birra dán jávrri. Johkamohki leansmánni lávii dávjá guolástit dan Apokjávrris.
Oktii son leai doppe guvttiin olbmáin. Soai galggaiga veahkehit su nuohti geassit. Ja go sii leat bargame dan barggu de gullogoahtá diet fasttes jietna. Orui dego olmmoš čuorvume doppe gáttis. De sii suhke fargga gáddái. Go ledje geassán fatnasa gáddái de dadjá leansmánni:
– De dál gal áiggun ságastit dieinna, várra son muitala mii su nu sakka givssida ja váivvida, dajai son.
Muhto su olbmát gal balaiga nu sakka, ja geahččaleigga bissehit su. Muhto leansmánni ii beroštan sudnos. Dajai dušše:
– Jus eahppi hálit oaidnit de fertebeahtti gomihit fatnasa ja suotnjalit dan vuollái.
Olbmát dagaiga dan. Doppe go veallába fatnasa vuolde de gullaba leansmánni čuorvume:
– Hei hei, boađe deikke, mu ságaide!
De álggii olles vuovdi šuvvat ja jietna bođii lagat ja ain lagat, ja gulaiga dego dávttiid mat skille. Ja de iđii olles dákteriggi meahcis. Leansmánni čurvii:
– Jesus namas! Bisán diesa!
Dákteriggi bisánii. De leansmánni jearrá:
– Mii lea mii nu sakka givssida du. Manne don baldalat olbmuid ja manin it oro jaska?
De gullui jietna sárdnume:
– Moadde jagi áigi leai muhton olmmoš dáppe. Son suoládii bohcco ja njuovai dan, ja jur mu hávddi nalde. Gurrii vel máli ja čoliid mu hávddi nala go lei geargan. Dan rájis mus ii leamaš ráfi. Muhto dál, go lean muitalan gii diet suola leai, de dovddan ráfi, ja dál bállen vuoiŋŋastit.
De diet dákteriggi dajai dien suollaga nama, ja nu son jávkkihii.
Leansmánni olbmát leigga jienajávohaga veallán fatnasa vuolde. Soai leaigga gal gullan, muhto eaba lean oaidnán maidege.
Dan beaivvi rájis ii gullon miige jienaid šat Apokjávrris.
Leansmánni muitalii suollagii maid leai gullan. Ja suola sakka suorganii ja dovddastii visot iežas suolabargguid. Ja dat suola gal ráŋggáštuvvui dain suolabargguid ovddas maid leai dahkan.