PÅ NORSK:
(Muitaleaddji: Aage Solbakk)
Na, mu namma lea Lemet-Jon-Åge sámegillii, ja dárogilli Åge Solbakk, riegádan ja bajásšaddan dáppe Fanasgiettis, Deatnogattis.
Mis lea ovdamearkka dihte dakko lahka dán báikki lahka, dahje Geavnjja vuolde: báikki namma lea Goavddesgur-sieidi. Goavddesgurra mearkkaša ahte dieppe leat dolin noaiddit bálvalan dalle dan sieiddi.
Dološ olbmot leat muitalan, ja mon lean maiddái lohkan maid Jakob Fellman lea čállán, go son lei Ohcejot báhppa 1820s gitta 32i rádjái. Ja dat gažadii guovllu olbmuid luossabivddu birra ja dieđusge oskku birra ja nu viidáseappot. Ja lei muhton Láite, dat lei mu máttar-máttárádjá vielja, movt sii lávejit bálvalit sieiddi dahje diekkár bálvvosbáikki. Ovdamearkka dihte luossabivddu dahje guolásteami oktavuođas.
Giđđat go olmmoš gottii vuosttaš luosa, de galggai addit dalle oaivvi ja čoliid dan luossaipmilii dahje guolleipmilii. Ja dainna doaivagiin ahte šaddá buorre luossajahki. Ja dalle dieđus, go de bidjalii dan sieiddi ala, dahje dan sieiddi oaivái. De dadjala dalle: “Vuidojuvvo vuidojuvvo, bassi sieidi, bora dahje it bora, leage datte mu ipmilan”.
Ja mon barggan dan juohke giđa. Ja de lea fas eará ášši jáhkán (oskun) go dasa man bálvalan, vai in. Muhto mon bálvalan. Dat lea dieđusge bisuhit, doalahit boares árbevieru. Ja dien barggan juohke giđa.